Кеншілер күні 65-рет тойланды

Кеншілердің киелі мекені Қарағандыда дәстүрге айналған Кеншілер күнін мерекелеу бейсенбіден басталып, күні кешеге дейін тойланды. Кеншілер құрметіне арналған бұл мереке осымен 65-рет тойланып отыр.
Ең алғаш рет Шахтерлер күні аталып өткенде Қарағандының он кеншісіне Социалистік Еңбек Ері атағы беріліпті. Сонымен қатар бассейннің 3200 кеншісі ордендер мен медальдармен марапатталып, ал ұзақ жылғы мінсіз де адал еңбегі үшін 119 адамға Құрметті кенші атағы беріліпті. Ал 1978 жылдың 18 қаңтарында тарихи тағы бір оқиға тіркелді. Осы күні «Северная» шахтасында Горбачев, Костенко және Кү­зем­баев атындағы шахты жұмысшы­ла­рының қатысуымен бассейннің тарихында миллиард тонна көмір шығарылған екен.
Салтанатты жиында сөз алған облыс әкімі Әбілғазы Құсайынов кеншілер қауы­мын мерекемен құттықтап, жүрек­жарды лебізін жеткізді.
– «Біз сіздерді мақтан тұтамыз, қадірлі кеншілер, ардагерлер. Сіздердің еңбек­теріңіз еліне адал қызмет етудің, қажырлы еңбектің жарқын үлгісі болып қала бере­ді», – деді облыс әкімі. Ол сондай-ақ ар­да­герлердің салған сара жолын кенші­лер­дің бүгінгі толқыны да лайықты жалғас­тырып келе жатқандығын айтып өтті. Кө­мір өндірісі Қазақстанның Тәуелсіздік ал­ған жылдары өңірдегі алдыңғы қатардағы салалардың бірі болып қалуында олардың қосқан үлесі өте зор. Салтанатты жиында аймақ басшысы бірқатар кеншіге облыс әкімінің Құрмет грамотасын тапсырды.
Сонымен бірге көмір департаменті бір топ кеншіні түрлі дәрежедегі «Кеншілер даңқы», «Еңбек даңқы» белгілерімен марапаттады. Соның ішінде Олимпиада чемпионы Серік Сәпиев те бар. Чемпионға кен­ші­лердің «Қорғау» кәсіподақ ұйымы көмір өнеркәсібінің «Құрметті қызметкері» белгісін тарту етті. Ал саңлақ ұл бұл марапатты 35 жыл шахтада еңбек еткен әкесі Жұ­манғали лайық деп білетінін айтып, белгіні әкесінің омырауына қадағаны да жұрт аузында біразға дейін жыр болып айтылары даусыз.