Биылғы егін ору науқанында керекулік картоп өсірушілер «екінші нанның» рекордтық көрсеткішіне қол жеткізбек. Өңір бойынша 320 мың тонна картоп жиналады деп күтілуде. Бұл – облыс тұрғындары бір жылда тұтынатын мөлшерден алты есеге көп. Айта кетерлігі, облыста астық пен көкөніс өнімдері, картоп өткен жылдарға қарағанда аста-төк өнім беруде.
Қазіргі таңда павлодарлық шаруалар картопты Астана, Алматы, Қарағанды, Шымкент, Ақтау және Атырау қалаларына тасымалдауда. Сонымен қатар «екінші нан» өсірушілер Ресей, Бурятия, Якутия елдерімен іскерлік байланыс орнатып, алыс-жақын шетелдің нарығын «жауламақ». Биыл аймақтағы суармалы егістің 35 пайызын картоп құраған. Тамшылатып суару әдісіне көп көңіл бөлініп, өсіру технологиясының голландтық әдісін іске қосқан 20-дан астам шаруашылық бар.
Нұржан ӘШІМБЕТОВ, Павлодар облысы әкімінің орынбасары:
– Ертіс өзенінің жайылмасы біздің шаруалар үшін тамаша жағдайлар тудырып отыр. Суармалы жерлердің көлемін ұлғайтудың және озық технологияларды қолданудың арқасында жыл сайын өнім көлемі артуда. Павлодар – Қазақстан аумағындағы ең ірі картоп экспорттаушы аймақ. Ресейдің Омбы, Түмен, Новосібір қалаларына, Якутия, Бурятия Республикаларына мыңдаған тонна картоп тасымалданып жатыр.