Аяқкиім таңдауда нені ескерген жөн?

Қазір әмбебап базарға барсаңыз, аяқкиімнің түр-түрі тізіліп тұр. Ресейдікі дейсіз бе, түріктікі дейсіз бе, «фабричный Пекин» дейсіз бе, қара базарда аяқкиім атаулы жетіп-артылады. Сонысына қарай бағасы да әрқилы. Мәселен, түріктікі Ресейдікінен, Ресейдікі Қытай өнімдерінен қымбат. Бір байқағанымыз, біздің елдің халқы, негізінен «фабричный Пекин» аяқкиімдері мен түрік аяқкиімдерін көбірек тұтынады. Жалпы, аяқкиім нарығында біздің отандық өнімнің алатын үлесі 3,5 пайыз ғана екен. Әзірге аяқкиім турасында біздің отандық өнім өндіруде мақтанар тұсымыз мардымсыз болып тұр. Отандық өнім өндірушілер осы 3,5 пайыздың өзі қара базарға түскенде өзіндік құнын ақтамай жататынын да жасырмайды. Бұл – өз алдына бөлек әңгіме...

Бүгінгі айтпағымыз – біз жаздық аяқкиімді дұрыс таңдай білеміз бе? Аяқкиім таңдағанда нені ескеру керек? Бұл ретте мамандардың басым бөлігі аяқкиім таңдарда мынадай жайттарды қаперге алған жөн екенін ескертеді:

• Бірінші, аяқкиім алуға кешкісін немесе түс ауа бармаңыз. Бұл аралықтарда адамның аяғы ісініп тұрады да, өзіңізге үлкен мөлшерлі аяқкиім таңдап қоюыңыз мүмкін. Демек, аяқкиім таңдауға ең қолайлы кез – таңертеңгі мезгіл.

• Бұдан соң екінші бір ескеретін жайт –  теріден тігілген бе, жоқ па, осыған назар аударыңыз. Егер аяқкиімнің сыртқы тіні ішке қаратып тігілген болса, ол аяқкиімнің таза теріден тігілмегендігін айқындайды.

• Тағы бір назар аударатын дүние – аяқкиімнің аяққа жайлылығы. Мамандар, негізінен, әйел адамдарға жаздыгүні биік өкшелі аяқкиім киюге аса бейіл болмау керектігін айтады.

• Төртінші бір жадыңызда ұстайтын жайт – жаздық аяқкиім неғұрлым ашық түсті болғаны абзал. Бұл аяқтың ылғалданбауына өзіндік әсерін тигізеді.

• Бұдан соң, әрине, сатып алатын аяқкиіміңіздің бағасына назар аударасыз. Осы тұста сатушыдан тұтынушы ретінде тауардың сертификатын сұрауды да ескеріңіз.

Міне, аяқкиім таңдауда осы қағидаларды есте ұстағаныңыз жөн. Бұған қоса аяқкиіміңіздің түр-түсі міндетті түрде киіміңіздің түсіне сәйкес келуі шарт емес. Бастысы, таңдаған тауарыңыз сапалы әрі жарасымды болуына назар аударыңыз.
Ал балаларға аяқкиім таңдарда неғұрлым буынға оң әсерін тигізетін емдік аяқкиімдерді таңдаған жөн. Бұл, әрине, сіздің қалтаңызға ауырлау да тиюі мүмкін. Дегенмен медицина мамандары балаларға Қытайдың аяқкиімдерін кигізбеуге тырысу қажеттігін айтады. Бұл ретте сарапшы-маман Айсәуле Тілеукина: «Қазір ресейлік аяқкиім өнімдері де қолжетімді бағада сатылуда. Осыған орай айтарым, ресейлік «Совенок», «Беби-бум» фирмаларының балаларға арналған өнімдері 2000 теңге мен 5000 теңгенің айналасында. Сондықтан неғұрлым «фабричный Пекиннен» гөрі, түрік немесе Ресей аяқкиім өнімдерін алған дұрыс», – дейді.