Мұраларға қатысты мереке Ықылас мұражайында тойланды

18 мамыр –  Халықаралық мұражай күніне орай Алматыда Ықылас Дүкенұлы атындағы музыка­лық халық аспаптар мұражайында қала­лық мәдениет басқармасына қарасты мұражайлар бірлесіп «Мұражай – тарих мұрасы» атты мәдени шара өткізді. Осы жиында Ықылас Дүкенұлы атындағы халық музыка­лық аспаптар мұражайының қасы­нан құрылған «Сазген» фольк­лор­лық-этнографиялық ансамблінің алғашқы құрамы, ардагер өнерпаздар 30 жыл­дан асқан соң қайта бірігіп сахнаға шықты. 
Ықылас атындағы музыкалық халық ас­пап­тары мұражайы 1980 жылдары белгілі қо­ғам қайраткері, өнертанушы-этнограф Өзбе­кәлі Жәнібековтің ұйытқы болуымен ашылған. Ол кісі мұражайдың тұңғыш ди­рек­торы етіп қазіргі белгілі өнер зерттеушісі, күйші Жарқын Шәкәрімді қояды. Жарқын Шәкәрім ағамыз қылшылдап тұрған шағын­да құрған «Сазген» фольклорлық-этногра­фиялық ансамблінің алдында толқи сөйлеп, шараны ұйымдастыру­шыларға алғыс айтты. «Ұлттық өнерді дәріптеу бағытында Ықылас атындағы мұражайда, яғни Медеу ауданын­да жүргізіліп жатқан шаралар қаланың өзге аудандарына да үлгі болуы тиіс», – деп түйіндеді ойын өнертанушы ғалым.
Жанна ДОСАНОВА, Алматы қалалық Медеу ауданы мәдениет және тілдерді дамыту бөлімінің бастығы:
– Биылғы жыл Алматы қаласында «Мәдениет жылы» деп белгіленді. Сон­дықтан біздің ауданымызда тарихымызды түгендеуге, мұра-жәдігерлерімізді жаң­ғыртуға, ұлттық өнерімізді өрістетуге айрықша көңіл бөлінуде. Жуырда Респуб­лика сарайында Майра Ілиясованың «Алтын домбыра» атты концертін бірлесіп ұйымдастырдық. Енді, міне, Ықылас атындағы музыкалық халық аспаптар мұражайына да қолдау көрсетіп отырмыз. Бабаларымыздан қал­ған бай мұрамызды, ұлттық классикалық музыкамызды бүгінгі жас ұрпақ білсе екен деген ниетіміз бар.