Алматыдағы Темірбек Жүргенов атындағы Қазақ ұлттық өнер академиясында жазушы Тахауи Ахтановтың шығармасының желісі бойынша Тұңғышбай әл-Таразидың режиссерлігімен студенттер «Ант» тарихи-драмалық қойылымын сахналады.
Екі бөлімді тарихи қойылым Әбілхайыр хан мен оның қайраткерлік қырын ашып көрсетуге бағытталған. Әбілхайыр ханның айналасындағы айтыс-тартыс, билікке талас, отаршыл Ақ патшаның сұмпайы саясаты қойылымнан көрініс табады. Әбілхайырдың таққа отыруына елеулі үлес қосқан қос тұлға: Сауран сұлтан мен Бәтима ханымды сомдаған Әсет Есжан мен Динара Шымырбаеваның әртістік шеберліктері үлкен үміт күттіреді. Сонымен бірге Әбілхайыр хан, Төле би, Қайып хан, Сәмеке хан, Барақ сұлтан, Мыртық би, Жанарыс, Қоңтәжі рөлдеріндегі Мұрат Рысбек, Ерғали Спатаев, Еламан Құмарбек, Мақсат Рахмет, Дастан Қасымшал, Мақсат Сахиұлы, Медет Дүйсенбеков, Ұшқын Жамабек сияқты жас әртістер көпшіліктің сүйіспеншілігіне бөлене білді.
Аман ҚҰЛБАЕВ, Темірбек Жүргенов атындағы Қазақ ұлттық өнер академиясының проректоры, профессор, академик:
– Әртіс болу – оңай емес. Әртіске тарихи кейіпкерді сомдау үшін сол заманның көзімен қарай алатын терең білім, рухани байлық керек екені өз-өзінен түсінікті. Бүгінгі әртістердің ішінде өзі ойнайтын кейіпкерін танып-білмей жатып-ақ сөздерін жаттап алып сахнаға шығатындары жеткілікті. Дегенмен бүгінгі қойылымда әртістердің өз кейіпкерлерінің ішкі жан-дүниесін беруге деген ұмтылысы байқалады. Әсіресе Бәтима ханымды сомдаған Динара Шымырбекованың шынайылығы ұнады. Бұл жастардың болашақта талай белесті бағындырарына сенемін.
Ахтановтың «Анты» сахналанды
Последние статьи автора