Құран естісем кейде көзіме жас келеді, бұл қалыпты жағдай ма?

Құран қасиетті кітап, оны естіп отырған адамның кейде бойының тітіркенуі немесе еріксіз жас келуі сияқты т.б. құбылыстар болып тұрады, - деп хабарлайды Alashainasy.kz тілшісі Kazislam.kz-ке сілтеме жасап.

Мұндай жағдайдан қорқудың қажеті жоқ. Адам Құранды жиі естіп тұрмаған соң оның рухы Құранды солай қабылдауы да мүмкін.

Құран бір әуен емес немесе ислам нормаларының жинағы ғана емес, ол – адамның жанын емдейтін шипалы Кітап.

Алла Тағала Құран жайында:

«Құраннан иман келтіргендер үшін шипа әрі мейірім түсіреміз», – деп хабар берген (Исра: 82).

Егер адам арабша біліп, Құранның мағынасын түсінуі себепті жасына ерік берсе, онда бұл жүректің жұмсақтығын білдіреді. Әдетте мұны діндар әрі тақуа адамдардан көреміз.

Ал енді Құран оқылғанда арабша білмейтін адам көзіне жас алса, демек оның жанына Құранның оңды әсер етуі деген сөз.

Бастысы Құран оқылғанда теріс қылықтар (дауыстап күлу, секіріп жылау, балағаттау т.б.) жасамаса болғаны.

Егер адам Құран оқылғанда әдепсіз қылық көрсетсе, онда оның білікті, араби сауаты терең білімді маманнан кеңес алғаны мақұл.

Соңғы сағатта көп оқылған жаңалықтар осында Massaget.kz