ҚМДБ: «ТӘПСІРЛЕРДІҢ ТАҢДАУЛЫСЫ» ТӨРТ ТОМДЫҚ КІТАБЫ ЖАРЫҚ КӨРДІ (ФОТО)
Бүгін елордасы Нұр-Сұлтан қаласындағы Ұлттық академиялық кітапханада Бас мүфти Наурызбай қажы Тағанұлының жетекшілігімен қазақ және орыс тілдерінде шыққан «Тәпсірлер таңдаулысы» төрт томдық кітабының танытымы өтті.
Іс-шараға Ақпарат және қоғамдық даму вице-министрі Марат Әзілханов, ҚМДБ төрағасы, Бас мүфти Наурызбай қажы Тағанұлы, мемлекет және қоғам қайраткерлері – Мырзатай Жолдасбеков, Ғарифолла Есім, Оралбай Әбдікәрімов, Халық қаһарманы Бақытжан Ертаев, Нұр-Мүбәрак Ислам мәдениеті университетінің ректоры Мұхаммад аш-Шаххат әл-Жинди, сондай-ақ Сенат депутаттары Нұртөре Жүсіп пен Дана Нұржігіт, Діни басқарманың бөлім басшылары мен облыс имамдары қатысты.
Игі іс-шара қасиетті Құран оқумен басталса, Бас мүфти Наурызбай қажы Тағанұлы жиынға қатысушыларды ел Тәуелсіздігінің 30 жылдығымен құттықтап, ізгі тілегін, алғысын білдірді
«Тәубенің зоры – Тәуелсіздік» деген сөз бар. Ұлан-ғайыр даламызда асыл дініміздің қанат жайып, ғұламалардың, білімді азаматтардың шығуы, осындай еңбектердің жарық көруі – тәуелсіздіктің арқасы. Сирияның Алеппо қаласынан шыққан Мұхаммед Әли әс-Сабунидің әйгілі «Сафуатәт-тәфәсир» тәпсір кітабы қазақ және орыс тілінде жарық көріп отыр. Төрт томнан тұратын бұл еңбекті шығарудағы мақсатымыз – қасиетті Құран аяттарын халыққа дұрыс тәпсірлеу, халыққа Әбу Ханифа мәзһабын ұстанудың маңыздылығын дәріптеу, жастарға дұрыс діни мәлімет беру, елімізде дін тұтастығын қалыптастыру, деструктивті діни ағымдардың идеологиясына тойтарыс беру. Қазақ және орыс тілінде жазылған тәпсір кітабы оқырманға жеңіл, ықшамды берілуімен ерекшеленеді» деді Бас мүфти.
Жиынның құрметті қонақтары, ел ағалары Діни басқарманың игі бастамаларына сәттілік тілеп, жылы лебіздерін білдірді және құнды еңбектің жарық көруімен құттықтады.
