«Internet, Facebook, WhatsApp» сияқты әлеуметтік желілер арқылы бөгде (некелесу харам болмаған) ер-әйелдердің бір-бірімен пікір алмасып, сұхбаттасу барысында шариғи шарттар сақталуы керек.
Ол шариғи шарттар деп негізінен мыналарды атауға болады:
Біріншіден, шариғат талаптары шеңберінен шығып кетпеуі шарт. Халық арасына бүлік салатын, зинаға апаратын өрескел қалжың айту, нәпсі құмарлығын ояндыратындай сөздерді жазу, жаман суреттер жариялау, бірін-бірі ғайбаттау сияқты күнәлі істерге қатысты сөздерді алмасуға рұқсат жоқ екендігі анық. Бұл ер болсын, әйел болсын, бойдақ немесе отбасылы болғанына қарамай барлық мұсылмандарға ортақ талап.
Екіншіден, Ислам дінін, Алла Тағаланы, иман негіздерін, адамгершілік қасиеттерді насихаттауға немесе дін және ізгіліктен тұратын тарихты, салт-дәстүрді үйрену мақсатында ғана сөйлесуге болады. Фықһта: «Рұқсат қажеттілік көлемінде ғана болады» деген қағида бар.
Бұл шарттар орындалмаған жағдайда некесіз адамдар арасында, тіпті бүгін-ертең үйленеміз деп отырған жастардың өзі әлеуметтік желілерде хат алмасуы дұрыс емес. Бұл айтылғандардың бәрі шариғаттың қайнар көзінен алынған үкімдер. Оған жеңіл қарауға болмайды.
Тұжырымдай айтқанда, маңызды бір қажеттілік болмаған жағдайда әлеуметтік желілер арқылы бөгде ер-әйелдердің бір-бірімен сөйлесуі дұрыс емес.