Сағыздың «пломбаға» зияны бары рас. Дегенмен оны аса жиі пайдаланса ғана. Яғни сағыс тамақтан соң тіс тазалауға, ауыз шаюға мүмкіндік болмаған жағдайда ас қалдықтарынан тазарту және ауыздан шығатын демді жаңарту жасап шығарылған деп жазады «Ауырмаңыз!» газеті. Оны тамақтан соң 5 минуттай шайнау керек, сағаттап шайнап жүре беруге болмайды.
Жалпы, «пломбаны», егер ол дұрыс салынбаған болса, шеттері әлсіз болса, кез келген нәрсе бүлдіре алады. Мысалы, ирис сияқты жабысқақ кәмпиттер зиян. Ал «пломба» сапалы салынған болса, оған сағыз да, жабысқақ кәмпит те қауіпті емес.
«Жвачканы» сағаттап шайнамаса, ол тіс эмаліне де қауіпсіз. Оның құрамындағы қант (қантты алмастырушы зат) сілекей бөлінуіне әсер етеді. Ал сілекейде эмальды қалпына келтіретін минералдық заттар көп.
Мына кеңестерді есте ұстаңыз: иммунитет төмендеуі, дұрыс тамақтанбау, созылмалы стрестің тіске зияны бар. Мысалы, ревматизм, бүйрек ауруы, диабет кезінде тіс тез бұзылады. Ал бүлінген тісті созылмалы инфекция көзі деуге болады. Оның кесірінен адам жүрек және тамыр ауруларына ұшырауы мүмкін. Тіс «тасындағы» бактериялар пневмонияға себеп бола алады.
Мына жай да есіңізде жүрсін: фосфат-цемент «пломбаның» жарамдылық мерзімі – 1 жыл, ал композитті материалдан жасалғаны 5 жылға есептелген. Керамикалықтары желінбейді, 10 жылға дейін шыдайды. Амальгамнан жасалғандарының жарамдылық мерзімі – 10 жыл, бірақ олар 50-60 жылға дейін жарай береді.