«Вампир күйеу» көрерменге қызық сыйлады

Сыр өңіріндегі Н.Бекежанов атындағы драма театры құлаққа тосындау естілетін жаңа қойылымды көрермен назарына ұсынды. Драматург Серік Жұматтың «Вампир күйеу» комедиясы елдің езуін жи­дыр­мады десек те болады.
Спектакль желісі қарапайым қазақ ауылында өтеді. Оқиға қалада оқитын қызының «күйеуге шығамын» деген же­дел­хатынан басталады. Ол екі ортадағы пошта қызметкерлерінің кінәсінен ағайын арасында абыржушылық туғызады. Ауыл­дағы ағайындар қаладан вампир күйеу­ді күтіп отырады. Қыздың ата-анасы «күйеу баланың есімі қызық екен» деп таңданысады. Артынша ол есімнің қанішер деген мағынаны беретінін білгенде жағасын ұстайды. Ауылдағылар вампир күйеуді қарсы алуға ерекше дайындық жасайды. Әркім үйіндегі мылтығы мен ашасын алып, жол тосады.
Шын мәнінде барлығы өзгеше екен. Вампир деп жүрген күйеу баланың мамандығы банкир болып шықты. Алғаш­қыда не болғанын ұқпаған жас жұбайлар қате жазылған жеделхатты өз қолдарына алғанда барлығын түсінеді.
Бұл – жергілікті әртістердің биыл сахналап отырған тұңғыш қойылымы. Өткен жылы спектакль қоюға жергі­лікті бюджеттен соқыр тиын да қаралма­ғандықтан, жаңа қойылымды көпшілік назарына ұсына алмаған театр ұжымы «биыл жаңадан бес туындыны тарту етеміз» дейді.