Үрмелі аспаптар музыкасының кеші өтеді

Ақпанның 12-сі күні Құрман­ғазы атындағы қазақ ұлттық консерваториясының Үлкен залында үрмелі аспаптар музы­ка­сының кеші өтеді. Концертке ҚР еңбек сіңірген қайраткері, белгілі тромбоншы Александр Федянин дирижерлік етеді.
Консерваторияның баспасөз қызметінің хабарлауынша, кеш «Үрмелі музыка шеруі» деп аталады. Оған музыкалық жоғары оқу орнының үрмелі аспаптар оркестрі, үрмелі ағаш аспаптар квинтеті, гобойшылар ан­самблі және басқа да музыканттар қатысады. Бағдарламада Вольфганг Амадей Моцарт­тың «Дон Жуан» операсына арналған увер­тю­расы, Антонио Вивальдидің концерттері, Антонин Дворжактың «Славян биі» жина­ғы­ның үлгілері, академиялық музыканың басқа да әлемге әйгілі өкілдерінің үрмелі аспап­тарға арналған шығармалары орындалады. Музыканттар көрермендерді флейта, тром­бон, фагот, гобой, орган, кларнет, саксофон сияқты қалың көпшілік үшін беймәлім аспап­тардың сырына сырттай болса да қанығуға шақырады. Үрмелі аспаптар ұжымдары концертінің дирижері – ҚР еңбек сіңірген қайраткері, профессор А.Федянин. Концерт сағат 19.00-де басталады.