Ұлым дейтін жұрты бар

Қарағандыда халық суретшісі, қазақ бейнелеу өнеріне зор үлес қосқан қылқалам шебері Әубәкір Исмаиловтың 100 жылдығына арналған көрме облыстық бейнелеу өнері мұражайында ашылды. Көрме «Әлем көшпенді бояуында» деп аталды. Суретшінің қазіргі таңға дейін көркемдік, мазмұндық мәнін жоймай келе жатқан негізгі шығармалары –«Қарағанды көмір шахтасы», «Құрманғазы халық ортасында», «Қамбар батыр мен Назым қыз», «Қараой даласы», «Көртоғай», «Сарысу жайлауы», «Маңғыстау жағалауы», «Хан тәңірі» өнерсүйер қауымға етене таныс. Кезінде қылқалам шеберінің көркем шығармалары республикалық және одақтық көрмелерге қойылған еді.
Сонымен қатар халық сурет­шісінің сегіз қырлы дарын екені әм­беге мәшһүр. Талант­тың қолтаң­басы театр қойылым­дарында да, қа­зақ киносында да жатыр. Атап айт­қанда, «Исатай – Махамбет», «Отел­ло», «Ең­лік – Кебек», «Қозы-Көр­­пеш – Баян сұлу» театр қойы­лымдарын қой­­ды. Сондай-ақ «Қара жорға» және «Құсбегі» билерінің авторлық қойылымы да бар. «Тақиялы періш­те» және «Қыз Жібек» көркем фильм­дерінде сом­даған рөлдері де ел есінде.
Тұла бойына өнер тұнған осындай тұл­ғаның табиғи таланты бейнелеу өнерінде өшпес із қалдырды. Ол Қа­зақ­­станның халық суретшісі атағын алған сурет­шілердің алғашқы легінен еді.
Суретшінің 100 жылдығына арнал­ған шара бір көрмемен шектел­мейді. Дөң­гелек үстел, «Тақиялы періште» фильмін қою­шылармен кездесу өтті. «Тақиялы періште» филь­мі жұртшылық назарына ұсы­ныл­ды. Еске алу кеші де ұйым­дастырылды. Кеште әдейі ат терлетіп келген меймандар – ҚР Суретшілер одағы­ның төрағасы Байтұрсын Өмір­беков, КСРО Халық әртісі Би­бігүл Төле­генова мен сурет­шінің қызы Гүлзәмира Әубәкірова естелік­терімен, жылы лебіз­дерін жеткізді. Қарағанды облысының әкімі Бауыр­жан Әбдішев халық сурет­шісінің ел үшін ерен еңбегін атап, аймақтың мақтанышы деді.
Бауыржан ӘБДІШЕВ, Қарағанды облысының әкімі:
– Кез келген ұлттың, мем­ле­кеттің тарихында ел үшін аянбай еңбек еткен аяулы жандар болады. Ай­бынды Алаш жұрты сондай марқасқа ұлдардан кенде емес. Солардың бірі әрі бірегейі біздің жерлесіміз, Қа­зақ­станның Халық суретшісі Әубәкір Ысмайылов деп білемін. Әубәкір Ысмайылов – қазақ бейне­леу өнері­нің қалып­тасып, да­муына елеулі үлес қосқан зор тұлға. Оны өздеріңіз де жақсы білесіздер. Осыдан 80 жыл бұрын құрылған Сурет­шілер одағы осы Әубәкір ағамыздың тікелей бастама­сы болатын. Қылқалам шебері өз өмірінде 400-ден астам картина жазды. Оның барлығы да – егемен еліміздің тағдырлы тарихынан сыр шертетін құнды дүниелер. Қай шығармасын алып қарасаңыз да, туған халқына деген шынайы сүйіспеншілігі, зор мақтанышы айқын аңғарылып тұрады. Біз осындай біртуар тұлғаларды мақтаныш етеміз. Олардың ерен еңбегін паш етіп, өскелең ұрпаққа үлгі қыламыз. Себебі бұл – біздің қасиетті боры­шымыз, азаматтық парызымыз.
Бұл той суретшінің 100 жыл­дығына арналған тойдың заңды жал­ғасы ғана. Ал суретшінің туынды­ларын көпшілік наза­рына ұсынған көрме сонау АҚШ-та БҰҰ-ның ұйым­дастыруымен осыдан екі жыл бұрын бастау алған болатын. Одан беріде Алматыда халықаралық мәслихат өтіп, туындылары жинақ­талған аль­бом да шығарылған-тын. Астанада көшеге есімі берілген еді.