«Туған елдің түтіні» көрерменге жол тартты

3 қаңтарда «Қазақстан» ұлттық арнасында «Туған елдің түтіні» атты жаңа отандық телехикая көрсетіле бастайды. Онда қарапайым қазақ отбасының соңғы жиырма жылда бастан кешкен оқиғалары, Тәуелсіз елдің тарихы, оның өткені мен болашаққа бағдары баяндалады.
Мемлекет тарихындағы елеулі оқиға­лардың қарапайым елдің өміріне әсері, айрандай ұйыған отбасындағы бәйтерек­тей әкенің орны, сәбидің есеюі, жігіттің ел ағасы болуы – осының барлығы туған жердің, елдің тарихының бір бөлігі. Жалпы, Қазақстан мемлекетінің бұғана­сының бекіп, алғашқы дипломатиялық қарым-қатынас, саясаттағы, экономика­дағы қа­дам­дары, халықаралық спорттағы алғаш­қы жеңістер, бизнестің дамуы, тұңғыш теңгенің шығуы – барлығы да сериал кейіпкерлерінің өмірімен ұштаса отырып, көрерменге жол тартпақ. Тарих пен өмірді сабақтастыра отырып өрілген аталмыш хикая Тәуелсіздік алған жылда­рымыздағы өмірді баян етеді. Ал туған елдің топырағы, ауылдың самау­рындағы қайнаған шайы, туған үйдің түтіні кімге болсын ыстық.