Театрлар фестивалі сахна саңлағына арналды
Жетісу жерінде театрлар фестивалі шеру тартты. Бұл шара Қазақстанның Халық әртісі, Мемлекеттік сыйлықтың лауреаты, сахна саңлағы Бикен Римованың 90 жылдығына арналып отыр. Фестиваль – өнер майталманының есімін дәріптеп, ғибратты ғұмырын насихаттауда жетісулықтар көтерген жақсы бастамалардың бірі.
І.Жансүгіров атындағы Мәдениет сарайында бастау алып, облыстық драма театр шаңырағында жалғасқан «Бикен Римова – қазақ сахнасының саңлағы» атты фестиваль облыстық деңгейде өтіп, оған өңірдегі сегіз ұжым, яғни соңғы жылдары облыс аудандарында ашылған халық театрлары атсалысты.
Аяулы актриса болуымен қатар, өзін талантты драматург ретінде танытқан Бикен апаның «Қос мұңлық» қойылымы фестиваль шымылдығын ашты.
Байқаудағы «Үздік әйел бейнесі», «Үздік ер адам бейнесі», «Үздік режиссура» деп аталатын үш аталым бойынша жеңімпаздар анықталып, сый-сияпатқа ие болды. Бұл шара, біріншіден, Бикен Римованың өмірі мен өнерін ұлықтауға бағытталса, екіншіден, сол арқылы халық театрларының кәсіби деңгейін көтеруге де өз үлесін қосты.
