Қызылордада бұрын-соңды болмаған шара өтті. Жергілікті жұртшылық «Бауырсақ күні» атты арнайы акцияны қызыға тамашалады. Облыстың бас қаласындағы орталық алаңда көпшілік ұлттық дәстүрді ұлықтаған осындай оңды істің куәсі болды.
Сыр өңірінде қалың қазақ қоныстанған. Дегенмен бүгінге дейін төл дәстүрді төрге оздырған шаралар қатары кем болғаны жасырын емес. Сол олқылықтың орны енді толғандай. Соңғы жылдары елімізде аталмыш мереке кеңінен тойлана бастады. Үлгілі үрдістен қызылордалықтар да қалыс қалғысы келмеген секілді.
Орталық алаңға келушілер пісірілген ыстық бауырсақтан ауыз тиді. Жергілікті жастар ұйымдарының қолдауымен қазақ халқының салт-дәстүрлерінен қызықты қойылымдарды елдің назарына ұсынды. Мәселен, кейінгі буын өкілдері қыз ұзату, келін түсіру, бесікке салу, тұсаукесер, сүндетке отырғызу секілді дәстүрлерді тағы да бір мәрте халықтың санасына сіңіре білді.
Аталмыш шараның өтуіне Қызылорда облыстық ішкі саясат басқармасы мен «Болашақ жастары» қоғамдық бірлестігі ұйытқы болды. Жоғары деңгейде дайындығын көрсеткен ұжымдар арнайы марапатты иеленді.
Бауыржан МӘСТЕКОВ, «Болашақ жастары» қоғамдық бірлестігінің төрағасы:
– Арнайы акцияның мақсаты ерекше. Біз жастар бойына ұлтымыздың салт-дәстүрін сіңіріп, оны кеңінен насихаттауды дұрыс көрдік. Осының нәтижесінде оларды отансүйгіштік пен елжандылыққа тәрбиелей аламыз деген ойдамын.
Қызылордада «Бауырсақ күні» өтті
Последние статьи автора