Қытаймен мәдени байланыс нығаймақ

Жуырда Қазақ мемлекеттік қыздар педагогикалық университетінде «Қазақстан Республикасы мен Қытай Халық Республикасы арасындағы білім және мәдениет саласындағы қарым-қатынастардың нығаюы» тақырыбында дөңгелек үстел отырысы болып өтті.
Дөңгелек үстелде Қазақстан мен Қытай арасындағы білім және мәдениет сала­сын­дағы қарым-қатынастардың қалыптасуы мен дамуы, Қытай тілін оқыту және алған білімді ары қарай жетілдіру мәселелері, Қытай елінде білім алғысы келген жастарға қажетті ақпараттар мен білім және мәде­ниет саласындағы жан-жақты әріп­тестікті нығайту мәселелері талқыланды.
Жиынды Қыздар университетінің бірін­ші проректоры Баходир Алиев ашты:
 – Мемлекетаралық қатынастарда мәде­­ниет және білім саласындағы бай­ла­ныстар аса маңызды. Екі елдің білім және ғылым саласындағы ынтымақтастығының дамуына жоғары оқу орындары да зор үлес қосуда. 2009 жылдың маусым айы­нан Қазақ мемлекеттік қыздар педа­го­гикалық университеті мен Шинжияң педа­гогикалық университеті арасындағы достық қарым-қатынас орнатылғалы бері университетіміздің студенттері көп мәрте ақысыз түрде және Цин-каз компа­ния­сының тегін білім грантымен Шыңжаң педа­гогикалық университетінде тіл ұстарту курсында білімін жетілдіру мүмкіндігіне ие болса, біздің магистранттар 2008 жылдан бері Қытайдың астанасы Бейжің қала­сын­дағы Орталық ұлттар университетінде, сондай-ақ Үрімжі қаласындағы Шыңжаң педагогикалық университетінде ғылыми іс-тәжірибеден өтіп келеді.
Өз кезегінде Қытай елшілігінің мәде­ниет және білім саласындағы Алматыдағы елшісі Гау Чын мырза екі ел арасындағы достық қарым-қатынастың жылдан-жылға артып келе жатқандығын және оған маңызды мәселе ретінде қарайтындығын, сондай-ақ Қытай елінде білім алушы қазақ­стандық жастардың саны артқан­дығын атап өтіп, білім саласы бойынша ЖОО-мен бірлескен жобаларды жүзеге асыруға әрқашан әзір екендігін жеткізді. Елші сонымен қатар Қазақстанмен байла­ныс орнатылғаннан бері оқу орындарында өткізілген шараларға тоқталып, Қыздар универ­ситеті ұжымына елшілік тарапынан ұйымдастырылатын шараларға белсенді атсалысқандығы үшін алғысын білдірді. Оның айтуынша, келер жылы да Қыздар университетімен бірнеше біріккен шаралар ұйымдастыру жоспарлануда.