«Қорқыт-Қобыз» испандарды тәнті етті

Испанияда өткен халықара­лық байқауда Қазақ­станның намысын қорғаған қостанайлық апалы-сіңлілі Байшиналар «Қорқыт-Қобыз» әнімен жұртшылықты қайран қал­дырып, бас жүлдені жеңіп алды.

Испанияның Ллорет де Мар қаласында өткен BUEN VIAJE – 2010 халықаралық фестиваліне Ресей Федерациясы, Израиль, Литва және тағы да басқа елдерден жүздеген өнерпаз қатысты. Қостанайдан барған апалы-сіңлілі Нұргүл мен Фариза Байшиналар «жалғыз шауып» бәйге алды. Бұлай дейтініміз, барлық ел бірқатар әншілерін, мәселен, Израиль 45 өнерпазын әкелсе, Қазақстан атынан тек Байшиналар дуэті қатысқан болатын.
Байқауға Нұргүл мен Фариза төрт ән дайындап апарған болатын: қазақ тілінде – «Қорқыт-Қобыз» бен «Мұны неге біл­мей­­сің?..», ал қалған екі ән – орыс және фран­­цуз тілдерінде. Қазақ қыздарының әуелеген әсем дауыстарына ерекше ықылас білдір­ген шетелдік жұртшылық соңғы күні айтыл­ған «Қорқыт-Қобыз» әніне тамсанып, таң­ғал­ғаны сонша, көрермендер де, тіпті байқаудағы бәсекелестері де Нұргүл мен Фаризаны айналшықтап, аталмыш әнді қайтадан орындатқан. Ал жергілікті те­леа­рна Қазақстаннан келген қос қарлы­ғаштың әнде­рін прайм-таймда көрсетті.
«Үшінші орын алған жүлдегерлерден бастап хабарлаған еді, біздің атымыз ай­тыл­мағанға қамыға бастадық. Ең болма­ғанда үшінші орын алсақ екен деп тілеп едік. Қазылар алқасы Еуропа азаматтары болғандықтан, негізінен, еуропалық дауыс ырғағына көңіл бөледі деп ойладық. Сондықтан бірінші орын алған Ресей Фе­де­рациясынан кейін, «бас жүлде – Қазақ­стан» дегенде... Тіпті қандай күйде болға­ны­мызды сөзбен айтып жеткізу мүмкін емес», – дей­ді қуаныштары қойнына сый­май, бір-бірін толықтырып, жарыса сөйле­ген апа­лы-сіңлілер.
Әрине, «әу демейтін қазақ жоқ» десек те, керемет дауысымен қалың бұқараны баурап алу әркімнің қолынан келмейтіні анық. Нұргүл мен Фариза мұндай қасиеттің кімнен дарығанын айта алмай абдырады. «Анамыз – есепші, әкеміз – жеке кәсіпкер, туыс-туғандардың ішінде өнерге қатысы бар бірде-бір адам жоқ», – дейді олар. Де­генмен де ән салу қазақтың қанына әбден сіңген қасиет қой. Өздері үлгі тұтатын Алты­най Жорабаева, Гүлнұр Оразымбетова сынды апаларындай туған халқының ән құдіретін асқақтатуға асыққан апалы-сің­лілі Байшиналар бұған дейін де бірқатар сыннан сүрінбей өткен. Вокалдық жетек­ші­лері Раушан Ногаеваның жетекшілігімен «Алтын микрофон», «Бозторғай» атты халы­­қаралық байқаулардың жүлдегерлері атанса, былтыр Болгарияда өткен байқауда да Қазақстанның байрағын биік тұғырдан көрсетіп қайтты.
«Қобыз бабалардан қалған, Қорқыт – өкініш пен арман» деп Испанияның тө­рін­де қазақ өнерін, тіпті қазақ тарихын паш еткен жас таланттарымызға Израильдің өнерпаз делегациясының жетекшісі жүгіріп келіп: «Сіздердің тілдеріңізді түсінбесем де, әндеріңіздің құдіретін түсіндім», – де­ген екен.