Қазақша Уикипедия 200 мың мақаламен толығады

Алдағы бір жыл уақыт ішінде қазақша Уикипедия – интернет энциклопедиясы 200 мың мақаламен толығады. Бұл туралы кеше Алматыда арнайы баспасөз мәлімдеме­сін өткізген Wiki Bilim қоры­ның өкілдері мәлімдеді.
Енді әлемдегі ең ірі әмбебап интернет-энциклопедиясын қазақшалау жобасын «Самұрық-Қазына» ұлттық әл-ауқат қоры қаржыландыратын болады. Ал оның іс барысын жаңадан құрылған Wiki Bilim қоғамдық қоры жүзеге асырады. Сондай-ақ басқа да бірқатар ғылыми ұжымдар қазақтілді интернет-энциклопедияны дамыту жобасына қол ұшын беруге уәде беріп отыр.
Әлемдегі интернет пайдаланушылар­дың сүйікті «кеңесшісіне» айналған бұл энци­клопедияда әлемнің 281 тілінде жа­зылған ақпарат қоры бар. Алайда қазақ­стандық интернет тұтынушылар мәлімет­терді Уикипедияның  орыс тіліндегі нұсқа­сынан танысуға мәжбүр. Баспасөз конференциясына қатысқан Мәжіліс депутаты Мұрат Әбеновтің айтуынша, қазақша Уикипедиядағы мақалалар саны орыс тіліндегі нұсқадан 100 есеге жұтаң. «Қазір елімізде мәдени мұра бойынша жасалып жатқан жұмыстар бар, сондай-ақ түрлі энциклопедиялық жобалар, ғылыми жұмыстар, басқа да мәлімет қорлары же­тер­лік. Алайда соның барлығы Уикипедия­ға енгізілмеген. Соның барлығын ұйымдас­тырып, ауқымды жұмыс жүргізу керек», – дейді халық қалаулысы. Депутат Мұрат Әбенов бұл мәселенің заңдық жағын да қарастырып, авторлық құқық мәселесін дұрыс жолға қою қажеттігін атап өтті. «Бұл мәселе қазір Парламентте қаралып жатыр. Мәселен, интернеттегі ақпараттардың тегін әлде ақылы түрде болуы автордың келісімі арқылы жасалуға тиіс», – деді ол.
 Ерекше атап өтерлік жайт, қазақша Уикипедия сайты жақын уақытта «Қазақ энциклопедиясы» баспасының мәлімет­терімен толығады. Wiki Bilim қоғамдық қорының өкілі Рауан Кенжехан «Қазақ энци­клопедиясы» баспасы өзінің он том­дық жарияланымын Уикипедияға енгізуге келісімін беріп, оның электронды нұсқасын ұсынғандарын жеткізді. «Қазақ энцикло­пе­диясы» баспасының директоры Бауыр­жан Жақып: «Халыққа қажетті ақпаратты неғұрлым қолжетімді ету – заман талабы. Сондықтан біз қазақтілді аудиторияның сұранысын қанағаттандыру үшін барлығы­мыз бірлесіп жұмыс жасауымыз қажет», – дегенді айтады. «Сондықтан біз баспа­мыз­да жарық көрген өнімдерді, оның ішінде интернет тұтынушыларға ерекше қажет болатын әмбебап және салалық энциклопедияларымызды ұсынамыз. Оның ішінде екі томдық «Қазақстан ғылы­мы» энциклопедиясын, үш томдық Бала­лар энциклопедиясын, Қазақстанның жер, су атауларын қамтитын төрт томдық «Қазақстан табиғаты»  атты жарияланымдар интернет пайдаланушыларға таптырмас құрал болады деп сенеміз», – деді «Қазақ энциклопедиясы» баспасының директоры.
Уикипедияның көптеген интернет жобалардан басты ерекшелігі – бұл элек­трон­ды энциклопедиядағы жазбаларды жа­за­тын да, дамытатын да, тұтынатын да – қарапайым интернет пайдаланушылар. Кез келген интернет пайдаланушы өзі жаңа мақала енгізе алады немесе бұрыннан бар ақпаратты жан-жақты толықтыра алады. Соңғы он жылдың ішінде ол әлемдегі ең таны­мал сайттардың біріне айналды. Уики­педия сайтына кірген адамдардың саны жағынан әлемдік сайт­тардың алғашқы бестігіне кіреді. Ол әлем­нің 281 тілінде мәлі­мет береді. Барлық тіл­дердегі мақала­лар санын қосып есеп­тегенде, 18 ми­л­лион­нан астам жазба бар екен.