Ертең – қазақ кәсіби музыкасының көрнекті тұлғасы Мұқан Төлебайұлы Төлебаевтың туған күні. Бұл күні даңқты композитордың мерейтойы оның өзі педагогикалық қызмет атқарған Құрманғазы атындағы Қазақ ұлттық консерваториясында аталып өтеді. Наурыздың 13-інен 20-сына дейін бұл оқу орнында өнер мамандықтары бойынша өтетін республикалық студенттік олимпиада да М.Төлебаевтың ғасырлық мерейтойына арналып отыр.
Консерваторияның Үлкен залында ертең сағат 10:00-де композитордың шығармашылығына арналған «Таусылмас жарқын тұлға» атты кітап көрмесі ашылады. Дәл осы жерде музыкатанушы ғалымдар «Мұқан Төлебаев және қазіргі заманғы музыка өнері» атты ғылыми-практикалық конференцияда бас қосады. Кешке Камералық залда М.Төлебаев туындыларының концерті болады. Бұл күні консерваторияда республикалық студенттік олимпиада басталады. Ол дәстүрлі музыка өнері, вокалдық өнер, композиция, дирижерлік ету және арт-менеджмент мамандықтары бойынша өтеді. Консерватория өкілдерінің айтуынша, М.Төлебаев шығармашылығына арналған шаралар жыл бойы жалғасын табады.