Бүгінде еліміздің ақпарат кеңістігінде балаларға арналған басылымдар мен интернет порталдар көп емес. Болса да қазіргі нарық талаптарын игеріп, оқырман аудиториясына кеңінен танылғандары некен-саяқ. Әйтсе де аз уақыт ішінде өзінің бағыт-бағдарын айқындап, мазмұндық сипаты мен қолтаңбасын қалыптастырып үлгергендері де жоқ емес. Солардың ішінде «Мөлдір бұлақ» журналы – бүгінгі қазақ баласының сүйікті басылымдарының бірі екендігінің куәсі болып жүрміз.
«Қазақстан-Zaman» ЖШС қанатының астында шығып келе жатқан бұл журналдың жарық көре бастағанына 10 жыл толып отыр.
Аталған басылымға кезінде Елбасымыздың өзі батасын берген болатын. Қазіргі уақытта журнал 30 мың данамен тарайды. Бұл балалар басылымы үшін төмен көрсеткіш емес. Журнал балалардың сұранысы мен талабын ескеріп, жан-жақты танымдық, әдеби-көркем мақалаларымен оқырмандардың ілтипатына бөленіп келеді. Балғын бояу шеберлерінің түрлі-түсті суреттері басылымның ажарын арттыра түсуде. Шәкірттердің білімін үнемі дамытып отыруға мүмкіндік беретін тест сұрақтары шәкірттердің білімінің толығуына көмекші құрал болып отыр.
Сондай-ақ жыл сайын өткізіліп жүрген дәстүрлі бәйгелеріміздің орны бөлек. Оған ондаған оқырмандарымыз қатысуда. «Жүзден жүйрік атанған» оқырмандарымыз жүлделі орындарға ие болып, бағалы сыйлықтарды қанжығасына байлауда. Бәйгеге қатысқан барлық оқырман арнайы дипломмен марапатталуда.
Тырнақалды шығармалары «Мөлдір бұлақ» журналында жарық көрiп, шығармашылықтарын өрістеткеннен қаншама жас тілшілер мен суретшілер үлкен өмipгe жолдама алды. Осылай жас оқырмандарын қанаттандыра отырып, журналдың өзi де, қызметкерлері де көптеген жетістіктерге жетті. Соның бipi де, бipeгейі деп, 2006 жылы Қазақстан Журналистер академиясының «Ең үздік балалар журналы» деген аталыммен «Алтын жұлдыз» сыйлығын жеңіп алғанын айтар едік.
Қазақстан Журналистер одағы да, ақпарат құралдарында жемісті қызмет атқарғаны үшін және журналдың 10 жыл толу мерекесіне орай арнайы дипломмен марапаттады. Дипломды Одақ төрағасы Сейітқазы Матаев тапсырды.
Сондай-ақ журнал мазмұн және көркемдік тұрғыдан ғана жаңғырып, жетіліп қана қоймай, үстіміздегі жылдың алғашқы айынан бастап бет көлемін де көбейтті. Журнал бұрын 28 бет, орысша қосымшасымен 32 бет болып шығып келсе, енді сәйкесінше қазақшасы – 32, орысшасымен 36 бетке көбейіп, тынысы кеңейді. Қазақтың тұңғыш педагогі Ыбырай Алтынсариннің «Таза бұлақ» әңгімесінің үлгісімен аты «Мөлдір бұлақ» деп қойылған бұл журнал балалар мен жас жеткіншектерді бұлақ болып сусындатып, 10 жылдың көлемінде кең дарияға татитындай мөлдір нәр мен құнар берген болар. Бірақ «Мөлдір бұлақ» бұған тоқмейілсімейді, алда да жас зиялыларға қызмет етіп, олардың талабы мен талантын ұштап, шыңдап, биік белестерге жетелей береді. Жас ұрпақ «Мөлдір бұлақтан» сусындасын.
«Мөлдір бұлақ» ұжымы