Күйге толы оқулық
Белгілі қызылордалық күйші Төлепберген Тоқжановтың құрастыруымен «Сыр бойы күйлері» атты еңбек жарық көрді.
Оқу құралы болып есептелінетін бұл кітапқа Сыр өңірінен шыққан атақты күйші-композиторларының туындылары жинақталған. Оқулық «Қазақстан Республикасының Тұңғыш Президенті» атындағы қоғамдық қор ұйымдастырған әлеуметтік жәрмеңкеде қолдау тапқан. Осының нәтижесінде «Ақиқат нұры» қоғамдық бірлестігінің жобасына сәйкес жарық көрді. Музыкалық білім беретін оқу орындарына арналған оқу құралының алғысөзін ҚР Халық әртісі, Мемлекеттік сыйлықтың иегері Қаршыға Ахмедияров пен Қазақстан Республикасының еңбек сіңірген қайраткері, профессор Айтқали Жайымов жазған.
Сыр бойы күйлері топтастырылған бұл еңбекті Құрманғазы атындағы Қазақ ұлттық консерваториясы мақұлдап, республикалық колледждер оқу-әдістемелік бірлестігі баспаға ұсынған. Аталған кітаптың жарық көруі – «Мәдени мұра» мемлекеттік бағдарламасы аясында өңірде атқарылып жатқан игі шаралардың бір парасы.
