«Кәусар бұлақ» оқырманға жол тартты

Жуырда «Баянжүрек» баспасынан «Кәусар бұлақ» кітабы жарық көрді.  Бұл кітапқа «Дарабоз» халықаралық бәйгесінен орын алған шығармалар топтастырылған. Балаларға арналған шығармалар­дың ішіндегі ең таңдаулылары жинақталған бұл кітап жас оқырмандарымыз үшін үлкен сый болды. Кітап «ZHERSU» корпора­циясының демеушілігі­мен жарық көріп отыр. Жүлдегер шығарма­ларды жарқыратып шығаруда «Баянжүрек» баспасы айтарлықтай еңбек сіңірген.
Жас оқырмандарымыздың көзайымы болған кітап «Дарабоз» бәйгесі мен «Кәусар бұлақ» сериясына тоғыз жылдан бері демеушілік етіп келе жатқан Бауыржан Оспановтың алғысөзімен ашылған.  Алғы­сөзде Бауыржан Кеңесбекұлы: «Кітап – жан азығы» дегендей, кез келген адам­ның өмірде қалыптасып дамуының, мәдение­тінің жоғарғы деңгейдегі жетістіктерге жетуінің бірден-бір құралы білім екені дау­сыз.
Пайда ойламай, ар ойла,
Талап қыл артық білуге.
Артық ғылым кітапта,
Ерінбей оқып көруге... – деп, ұлы Абай атамыз айтқандай, болашақта еліміз үшін аянбай еңбек етіп, үлкен азамат болып қалыптасуларыңа білімнің берері мол. Олай болса, осы кітап та, сендердің баянды болашақтарыңа апарар игі баспалдақтар­дың қатарынан табылсын.
Өздеріңе арналған қазақ жазушылары­ның ең үздік шығармалары топтастырылған «Кәусар бұлақ» кітабын қабыл ал!» деп тілек білдірген.
Кітапқа «Дарабоз» бәйгесінің бас жүл­де­сін иеленген көрнекті балалар жазушысы Тұрдақын Жексенбайдың «Бала бүркіт» хикаяты, белгілі прозашы Гүлзат Шойбе­кованың «Үш бала» хикаяты, белгілі ақын, прозашы Cерік Байхоновтың «Жыл мезгілдері» өлеңдер топтамасы, Нарбин Кенжеғұлованың «Ғарыштың аманат бала­сы» фантастикалық әңгімесі, Пернебай Дүйсенбиннің «Нұрстан мен Аққанаттың бастан кешкендері» романтикалық ертегі-хикаяты, Ділдәр  Мамырбаеваның «Дина тәтей, балалар және мен» әңгімесі, Алты­най Амангелдінің «Домбыра» ертегісі, көрнекті ақын Жәркен Бөдешұлының «Киік­тер патшасы» сахналық қойылымы, Дәнеш Ахметұлының «Ақдидар» хикаяты, Есенәлі Ералының «Айжан қыз, ала күшік және жасыл жылан» әңгімесі, белгілі ақын Алмат Исәділдің «Мен тәртіпті баламын» өлеңдер топтамасы, Кеңес Оразбекұлының «Май әже және күндей қыз» ертегі әңгі­месі топтастырылған. Жоғарыда айтқаны­мыз­дай, бұл шығармалардың барлығы да – 600-ден аса шығарманың ішінен іріктеліп алынған жүлделі шығармалар. Сон­дықтан қай-қай шығарманы болмасын, көркемдігі жоғары деп айта аламыз.
Кітаптағы әр шығарма мазмұнына сай арнайы салынған суреттермен бірге беріл­ген. Бұл ретте кітаптың суретшісі Алтай Айтжановтың еңбегін айта кеткеніміз жөн. Әр суретті шығарманы оқып, мағынасын терең түсініп салғаны көрініп тұр. Және ас­қан шеберлікпен бедерлеген. Бұл да біздің бүлдіршіндеріміз үшін көзқуаныш екені анық.
Еліміздің жас оқырмандары үшін баға жетпес зор байлық, үлкен қуаныш болған кітап 2000 данамен жарық көрді. Бұл кітаптың азғантай бөлігі авторларға сыйға берілді. Ал қалған бөлігі тұтастай еліміздің әр аймағындағы мектептер мен кітапха­наларға тегін таратылады.
«Кәусар бұлақтың» бұл кітабы да әдет­тегідей орыс тіліне аударылып, «Чистый родник» деген атпен жарық көргенін айта кетейік. Бұл орістілді оқырмандар үшін және балалар әдебиетінің кең қанат жаюы үшін сауапты іс екені айқын. Шығармалар­ды белгілі аудармашы қаламгерлер Нар­бин Кенжеғұлова, Алмат Жарылқасынов, Марат Әдібаевтар сәтті тәржімалаған.
Жас оқырмандардың сұранысын қана­ғаттандыруда, балалар әдебиетін жандан­дыруда айтарлықтай іс ындырып келе жат­қан ұйымдастырушылардың бұл жолғы еңбегі де еліміздің рухани-мәдени өмірін­дегі айтулы жаңалық болды. Алдағы уа­қыт­тарда да жемісті боларына сенеміз.