Ислам ғылымы мен мәдениетінің даму кезеңдері талданды

Кеше Алматыдағы Ғылым ордасында Қазақстандағы ислам ғылымы мен мәдениетінің ХІІ ғасыры» атты ауқымды халықаралық ғылыми-тәжірибелік конференция табысты өтті.
Білімді тарихшы-ғалымдар мен дін­танушылар, саясаткерлер мен мәде­ниет­танушылар қатысқан бұл басқосуды Ра­мазан Сүлейменов атындағы Шығыстану институты, Қазақстан Респуб­ликасы Жо­ғары оқу орындары қауымдастығы және Тұран университеті бірлесіп ұйым­дас­тырып отыр.
Р.Сүлейменов атындағы Шығыстану институтының директоры Әбсаттар Дербі­сәлінің айтуынша, конференцияның мақ­саты – Қазақстандағы ислам ғылымы мен мәдениетінің даму кезеңдеріне талдау жасап, өткен тарихымызды түгендеуге ба­рынша үлес қосу. Осы орайда жиынға қатысушы ғалымдар әлемдегі ислам ғылымы мен мәдениетінің бұдан ары қарай даму кезеңдерін анықтау және қазіргі заманның сын-тегеуріндеріне жауап қайтару тұрғысында пікір талас­тырып, ой жарыстырды.
Бүгінде Тәуелсіздігін тұғырына көтеріп, өз алдына егемен ел болып отырған Қазақ­стан өткен тарихы мен рухани құн­дылықтарын жаңаша көзқараста зерделеу үстінде. Тарихи жадыны жаңғырту  ұлттың интеллектуалды тұрғыдан өсуіне зор ықпал етпек. Бүгінгі күні ислам әлемі­нің ғылым мен мәдениет сынды асыл құн­дылықтары өркен жайған қазақ жерінде әлі де терең талдаулар мен зерт­теулерді қажет ететін дүниелер баршылық. Бұл ретте ұстаздар қауымы мен білікті ғалымдар шоғырына түсер сал­мақ орасан. Осы орайда «Қазақ­станда ислам ғылымы мен мәдениетінің дамуы­ның ХII ғасыры» атты мағынасы терең, ауқымды Халық­аралық ғылыми-тәжіри­белік конферен­ция жұмысы қазақ қоға­мына ғана емес, ислам әлемі үшін де маңызды саналатыны сөзсіз.
Конференцияға Қазақстан, Ресей, Өзбекстан, Әзірбайжан және Мысыр ел­дерінің көрнекті ғалымдары қатысты. Жиын­ның ашылу сәтінен кейін жарыс­сөздер болып, конференцияның екінші жартысы секциялық мәжілістерде жалға­сын тапты. Онда «Қазақстандағы ислам мәдениетінің дамуындағы негізгі кезең­дері. Қазақстан және мұсылман әлемі: дәстүрлі байланыстарды қалпына кел­тіру», «Қазақстан және Орталық Азия­ның тарихы мен мәдениеті бойынша агио­графиялық жазба дереккөздер. Қазақ­стандағы араб­ографиялық жазу мә­дениеті. Кітабилықтың жайылуы мен дамуының негізгі кезеңдері», «Ислам ғылымының Батыс өркениетіне тигізетін ықпалы: мұсылман әлемі және Батыс тұжырым­дамасына орай» деген тақы­рыптар бойынша талқылаулар жүр­гізілді.