«Ильхам» сыйлығы иесін тапты

Осыдан он шақты жыл бұрын Елбасы Нұрсұлтан Назарбаев еліміздегі бизнес­тің әлеуметтік жауапкерші­лігін арттыру мәселесін дұрыс жолға қою туралы бастама көтерген болатын. Осы бастаманың арқасында отандық кәсіпкерлер еліміздегі әлеуметтік, мәдени проблемаларға етене арала­са бастады. Меценат­тар арасында білім мен ғылымға қолдау көрсетіп жатқандары да аз емес. Меценаттардың түрлі қоғамдық сыйлықтары да бар. Солардың бірі – өзге ұлт өкілдерінен шыққан кәсіп­керлердің бір шоғыры тағайындаған «Ильхам» сыйлығы. Бұл сыйлық жаңа ғасырдың басынан бері тұрақты түрде беріліп келеді. Өткен аптада аталған сый­лық­тың биылғы иегерлерін марапаттау рәсімі өтті.
Ахметжан Ашири, жазушы, «Ильхам» тәуелсіз сыйлығының, Халықаралық «Алаш» сыйлығының иегері:
– Бұл сыйлықтың ғұмыры ұзақ боларына сенемін. Елбасының бизнес­тің әлеуметтік жауапкершілігін арттыру мәселесін қойған сәтінен бастап ұй­ғыр кәсіпкерлері құрған меценаттар клубы осы сыйлықты жыл сайын тап­сы­рып келеді. «Ильхам» – қазақтың тілі – менің тілім, Қазақстан – менің Ота­ным!» дейтін қоғамның әрбір саласына еңбегі сіңіп жүрген нағыз патриоттарына берілетін сыйлық. Бұл ұлттар арасын­дағы достықты қалыптастырады. «Қа­зақстандағы барлық ұлт өкілдері бір бауырмыз» деп сөзбен ғана айта салу емес, бұл – нағыз іс жүзіндегі әрекет.
Президент Нұрсұлтан Назарбаевтың «әлемдік нарықта бәсекеге қабілетті өнім шығаруды қамтамасыз ету» деген ұранын қолдау мақсатында сыйлықты тағайын­даған – «Республикалық өнеркәсіпшілер, кәсіпкерлер және ауылшаруашылық жұ­мыс­шылары қауымдастығы» қоғамдық қоры жанынан құрылған Меценаттар клубы әдебиет, мәдениет және ғылым сапында жемісті еңбек еткен тұлғаларға «Ильхам» сыйлығын табыс етті. Алғашқы жылдары ұйғыр ұлтының белгілі өкілдеріне берілген «Ильхам» соңғы жылдары ұлта­ралық мәртебеге ие болып, отандық зиялы қауым өкілдеріне беріліп келеді. Сегіз аталым бойынша, яғни «Ғылым», «Әде­биет», «Білім беру», «Бейнелеу өнері», «Спорт», «Музыка», «Театр», «Бейбітшілік», «Ұлтаралық және діни келісімдерді ны­ғайту жолындағы баға жетпес үлесі үшін» аталымдары негізінде берілді. «Музы­ка» аталымы сахна төрінде 35 жыл ән шыр­қап келе жатқан қазақ эстрада­сының мэтрі Роза Рымбаеваға табыс етілсе, «Әдебиет» аталымы  бойынша белгілі ақын Қасымхан Бегманов марапатталды. Осы аталым­дардың  ең салмақтысы, «Ұлтаралық және діни келісімдерді нығай­ту жолындағы баға жетпес үлесі үшін» ата­лымы бойынша С.Торайғыров атындағы Павлодар мемле­кеттік университетінің ректоры, белгілі қоғам қайраткері Ерлан Арын үздік деп танылыпты. «Ильхам» сый­лығы табыс етілген­нен кейін сөз алған Ер­лан Мұхтарұлы аузына алдымен әкесінің есімін алды.
Ерлан АРЫН, экономика ғылымының докторы, профессор:
– «Ильхам» сыйлығын табыс еткен азаматтарға мың алғыс! Елімізде мұн­дай сыйлықты алуға лайықты тұлғалар аз емес. Десе де шалғайдағы еңбегімізді ескеріп, ел алдындағы жұмыстарымыз­ды елеп, осы сыйлыққа лайық деп мені танығандарыңыз үшін рақметімді айта­мын. Әлбетте, бүгін, міне, осындай салмақты сыйлықтың иегері атануыма, осындай азамат болып қалыптасуыма еңбегі сіңген әкемнің сенімін ақтадым деп ойлаймын.
«Әке көрген оқ жонар» демекші, белгілі қоғам қайраткері, ағартушы-ұстаз Мұхтар Арыновтың отбасында өскен ұлы Ерлан Арын қазір әке жолын жалғастырып қана қоймай, еліміздің теріскейіндегі Павлодар облысының қоғамдық проблемаларына да етене араласып жүр. Облыстың қазақ­тануына мәслихат депутаты, университет басшысы, қарапайым азамат ретінде қо­сып жүрген үлесі ұшан-теңіз. Марапат­таудан кейін Ерлан Мұхтарұлымен аз-кем тілдесудің сәті түскен еді.
– Біздің басылымның да құттық­тауын қабыл алғайсыз, сыйлығыңыз құтты болсын!
– Рақмет. «Ильхам» деген сөздің аудар­масы «шабыт» дегенге саяды ғой. Мен  бүгін, шынымен де, шабыттанып тұр­мын. Және алдағы жұмыстарыма шабыт береді деп ойлаймын. Қазір әке жолында қызмет атқарудамын. Бұл маған өте ыстық. Ректор қызметінің ұтымды ұйымдастыру барысын­да ертеңгі болашақ ұрпаққа те­рең, мағы­налы білім беріп, ғылымды мең­геруіне жағдай жасайтын – жұмыс нәти­жесі. Сон­дықтан жауапкершілікпен ректор қызметін атқара беру жолында жалық­пай­мын.
– Сыйлықты алып тұрып алдымен әкеңіздің атын ауызға алдыңыз. Мұх­тар Арынды танымайтын ел кемде-кем. Ол кісі педагог бола жүріп ұлтқа қызмет етті. Байқап қарасақ, сіз де әке­ңіздің сара жолымен келе жатыр­сыз. Бұл кездейсоқтық па, әлде әке жолын қуу басты мақсатыңыз болды ма?
– Кездейсоқтық емес. Бұл әке қанымен қалыптасқан қасиет болса керек. Мұхаңның жолымен, рухани мәселелер тұрғысынан Керекуде жақсы істер атқару – парызым. Әрдайым рухани-мәдени игі шаралардың басы-қасында болып, игі істердің ұйытқысы болғанға не жетсін?!
– Шабытыңызға шабыт қосылып, ұлтқа қызмет ете бергейсіз!