«Еңлікгүл» иесін тапты
Халықаралық театр күні қарсаңында еліміздің сахна қайраткерлері қазақ өнерінің қара шаңырағы М.Әуезов атындағы Қазақ мемлекеттік академиялық драма театрына өте бір жылы, шуақты, мерейлі мерекеге – дәстүрлі «Еңлікгүл» сыйлығының тапсырылу салтанатына жиналды.
Мінбеге бірінші болып көтерілген Қазақстан Театр қайраткерлері одағының төрағасы Тұңғышбай Жаманқұлов күллі әріптестерін кәсіби мейрамдарымен құттықтай отырып, осы шараны өткізуге демеушілік жасаған «Қазмұнайгаз» ұлттық компаниясына жүрекжарды алғысын жеткізді. Сондай-ақ төраға театр саласына бүкіл өмірін арнаған, тіпті еңбектен әлі де қол үзбеген, өнерге шексіз берілген бірқатар ардагерлерге Құрмет грамоталары мен гүл шоқтарын тапсырды. Олардың қатарында М.Байсеркенов, В.Крымская, О.Ли, Т.Савченко, Қ.Абдырасулов, М.Бойченко, Л.Кәденова, Б.Тезекбаев сынды сахна шеберлері бар.
Биыл үшінші мәрте ұйымдастырылып отырған «Еңлікгүл» байқауына еліміздің 50 театрынан 127 ұсыныс түсіпті. Құрамында Театр академиясының профессорлары мен бірнеше өнертанушы мамандары болған комиссия үміткерлердің сынға салынған жұмыстарын талдап, таразылай келе, нағыз жүйріктерді анықтаған. Бас демеуші «Қазмұнайгаздың» биыл ерекше жомарттық танытуының нәтижесінде жеңімпаздарға ұсынылар жүлде де қомақты болып шықты. Яғни әр жеңімпаз арнайы статуэткамен қатар, 1 миллион теңге көлеміндегі сыйақыны еншіледі.
Рахман Омар, Сергей Погосян сияқты белгілі актерлер жүргізген жылы шырайлы кеш «Жалын», «Тұран», «Жігіттер» тобы, «Салтанат» би ансамблі өнерпаздарының концерттік нөмірлерімен әрлене түсті. Бұл ретте астаналық М.Горький атындағы Орыс драма театрының әртістері ұсынған «Чикаго» қойылымынан көрініс те көрермен көңілінен шықты.
«ЕҢЛІКГҮЛ - 2012» жеңімпаздары
1.«Жыл актері» – Әбілқасым Шоманұлы, Жезқазған облыстық Серәлі Қожамқұлов атындағы Қазақ музыкалық-драма театрының актері, Қ.Ахметовтің «Ауған қасіреті» спектакліндегі Маратхан рөлі үшін;
2.«Жыл актрисасы» – Дәрия Жүсіп, М.Әуезов атындағы Қазақ мемлекеттік академиялық драма театрының актрисасы – «Тендерге түскен келіншек» спектакліндегі Сағила рөлі үшін;
3.«Жыл режиссері» – Жанат Хаджиев, Ғ.Мүсірепов атындағы Қазақ академиялық балалар мен жасөспірімдер театрының режиссері – Ғ.Мүсіреповтің «Қозы Көрпеш – Баян сұлу» қойылымы үшін;
4.«Жыл суретшісі» – Тоғайбек Байдарбеков, Жетісайдағы Қ.Жандарбеков атындағы Қазақ музыкалық-драма театрының суретшісі;
5.«Қуыршақ театрының жыл өнерпазы» – Ұлбосын Момынжанова, Мемлекеттік қуыршақ театрының актрисасы;
6.«Жылдың опералық, балеттік партиясы» – Жандарбай Ерлан – Оңтүстік Қазақстан облыстық опера және балет театрының солисі;
7.«Театр өнеріне сіңірген еңбегі үшін» – Кеңес Жұмабеков, Қарағанды облыстық С.Сейфуллин атындағы Қазақ драма театрының актері;
1.«Жылдың жарық берушісі» – Алексей Шальнев – Солтүстік Қазақстан облыстық С.Мұқанов атындағы музыкалық-драма театрының жарық берушісі;
2.«Жылдың музыкалық көркемдеушісі» – Елена Мищенко, Шығыс Қазақстан облыстық Жамбыл атындағы драма театры;
3.«Жылдың театр менеджері» – Александра Кустовская, Астаналық М.Горький атындағы орыс драма театрының менеджері;
4.«Жылдың театртанушылық мақаласы» – Мәншүк Тәшімова, М.Әуезов атындағы Әдебиет және өнер институтының кіші ғылыми қызметкері;
5.«Жыл драматургі» – Болат Бекжан.
