Димаш Құдайберген өзінің Stranger әлемдік турына қатысатын кәсіби бишілерге кастинг жариялады, деп хабарлайды ҚазАқпарат dimashnews.com сайтына сілтеме жасап.
«Димаш Құдайберген өзінің Stranger әлемдік турына қатысу үшін кәсіби бишілерді іздейді. Іріктеуге қатысуға хип-хоп және контемпорари стилінде жұмыс істейтін барлық мүдделі бишілер шақырылады», - делінген сайтта жарияланған хабарламада.
Үміткерлерді әртістің командасы іріктейді. Іріктеудің бірінші кезеңінен өткен бишілер әлеуметтік желі арқылы жеке хабарламалар алады және офлайн режимінде өтетін кастингтің соңғы кезеңіне шақырылады.
Айта кетсек, Stranger туры аясындағы концерттер 29 сәуірде Ереванда Карен Демирчян атындағы спорт-концерт кешенінде және 6 мамырда Антальяда Akdeniz University Stadium стадионында өтеді.
Еске салайық, қазақстандық танымал әнші Димаш Құдайберген «Stranger» әлемдік турнесінен түскен қаражаттың бір бөлігін Түркияда зілзаладан зардап шеккендерге аударатыны хабарланған еді.