Баспагерлер сапа салыстырды

Еліміздің Мәдениет және ақпарат министрлігі таратқан мәліметтерге сүйенсек, жуырда қазақстандық баспагерлер Беларусь астанасы Минск қала­сында өткен Халықаралық «Кітап өнері» байқауына қатысып, жетістіктерге қол жеткізіп келген.
ТМД аумағындағы 11 мемлекет өкіл­де­рінің басын қосқан шарада баспа ісі мен по­ли­графия саласының бүгінгі озық үлгі­лері назарға ұсынылды.
Бірнеше жылдан бері республикамыз­дың ең үздік басылымдарының қатарынан лайықты орнын меншіктеп келе жатқан астаналық «Фолиант» баспасы осы байқау қорытындысында ірі табысқа қол жеткізіп, екі бірдей беделді марапатқа ие болды. Мерзімдік басылым, кітап шығару, кітап тарату және полиграфия саласындағы ынтымақтастық жөніндегі мемлекетаралық кеңестің белді де беделді қазылары негізгі «Достастық» аталымында «Фолиант» бас­пасы қазақ, орыс және ағылшын тілдерінде шығар­ған «Қазақстан-Ресей: мәңгі достық жо­лымен» атты  кітап-альбомына жоғары баға алды.
«АРТкнига» аталымында екінші орынға «Фолиант» баспасы мен түркі өркениетінің жалпы адамзат өркениетіндегі рөлі мен орнын зерттейтін, ірі халықаралық ғылыми орталық болып табылатын Халықаралық түркі академиясы бірлесіп жарыққа шы­ғар­ған «Түркі дүниесі. Turkic World» аль­манахы лайықты деп танылды. Жеті тілдегі ірге­лі ғылыми-көпшілік басылым ретінде танылған альманахта дүниежүзіндегі же­текші түркітанушы ғалымдардың зерттеу м­атериалдары, белгілі жазушылардың, мем­лекет және қоғам қайраткерлерінің ма­қалалары, түркі әлемінің бай тарихи-мә­дени мұрасына, өткені мен бүгініне, ке­ле­шектегі дамуына арналған мақалалары жарияланған.
Байқау талаптары бойынша, лауреат атанған кітаптар үстіміздегі жылдың қыр­кү­йе­гінде Мәскеу қаласында өтетін 26-ншы Халықаралық кітап көрме-жәр­мең­­кесінің арнайы экспозициясына қойы­ла­ды, содан кейін ТМД Тарих мұражайының кітап қорын байыту мақсатында Достас­тық­тың атқарушы комитетіне тапсырылады. Атал­ған көрме-жәрмеңке қорытынды­сын­да жүлдегерлердің дипломдары салта­нат­ты түрде табыс етілмек.