Кеше Тайландта күрес түрлерінен жасөспірімдер арасындағы әлем чемпионаты басталды. Тай елінің Паттайа қаласында ұйымдастырылған бұл додаға Қазақстанның да балғын балуандары аттанған еді.
Бірінші болып грек-рим күресінің шеберлері өз өнерлерін паш етті. Ең жеңіл салмақ, яғни 50 келіде Азия чемпионы Асқар Сәлтебаев белдесті. Доданы 1/8-финалдан бастаған Асқардың алғашқы қарсыласы – украиналық Василий Симоненко болған. Егер Симоненконың жауырынын жер иіскетер болса, жерлесіміз ширек финалда қытайлық Хайбин Фанг және грузиялық Бачана Путкарадзенің қай жеңгенімен боз кілемге шығуы тиіс болатын. Өкінішке қарай, Азия чемпионы күтпеген жерден Украина балуанынан жеңіліп қалды.
60 келіде ел намысын Мейірбек Дөненбеков қорғады. Бірақ, шынын айтсақ, Дөненбековтің жеребесі сәтті болмаған еді. 1/16-финалда ресейлік Заур Кабалоевпен белдескен. Алайда қарсыласына еш қарсылық таныта алмаған Мейірбеков 0:2, 0:3, 0:1 есебімен, даусыз жеңілді. Кабалоев финалға шығып, Мейірбек қола жүлдеге таласуға мүмкіндік алған. Жұбаныш белдесуінде алғашқы қарсыласы әзірбайжандықты жеңді де. Дегенмен бар күші сарқылған жерлесіміз поляктан жеңіліп қалды.
74 келідегі балуанымыз Азамат Құстыбаевтың жеребесі сәтті түсті ме, жоқ па, ол жағын алғашында тап басып айту қиын болатын. Өйткені бірінші кезеңді жіберіп, доданы бірден 1/8-финалдан бастағанымен Азаматтың қарсыласы боз кілем қожайыны Сиритахан болған. Дегенмен Құстыбаев та оңай шағылар жаңғақ емес екенін, көкірегінде намыс оты лаулап тұрғанын, оның үстіне, Қазақстанның ғана емес, Азияның да чемпионы екенін ескеріп, жерлесіміздің бірінші белдесуді жеңіспен аяқтайтынына сенімді болғанбыз. Шынында да, Азаматымыз қуантып, екі кезеңнің нәтижесі бойынша, 6:0, 6:0 есебімен айқын жеңіске жетті. Одан кейін Азаматқа қырғыз балуаны Самат Чирдаков та қарсы тұра алмады. Негізі, бұл балуандар бұған дейін Алматыда өткен Азия чемпионатында да өзара кездесіп, ол кезде де жеңіс жерлесіміздің еншісінде кеткен. Бұл жолы да Құстыбаев жеңіске жетті. Өкінішке қарай, жартылай финалда белорус балуаны Қазбек Килевке қарсы тұра алмады. Өте тартысты өткен белдесу 0:1 есебімен аяқталды. Ал қола жүлде үшін болған айқаста парсы жігіті Абдел Салех Бойеримен белдесті. Негізі, бұлар бұған дейін Алматыда өткен «Сары құрлық» біріншілігінің финалында кездескен. Сол кезде жерлесіміз жеңіске жеткен еді, бұл жолы жеңіс Иран балуанына бұйырды. Сөйтіп, өкінішке қарай, Азамат қолда тұрған жеңісін жіберіп алды.
Ал 96 келі салмақ дәрежесіндегі классигіміз Еркін Шайкенов алғашқы айқасында-ақ жеңіліп қалды. Гондурас елінің өкілі Кастилло Мейджа жерлесімізге еш мүмкіндік берген жоқ.
Сөйтіп, әлем чемпионатын жүлдесіз бастадық. Бүгін боз кілемге еркін күрес шеберлері шығады. Жүлдеге үш жерлесіміз таласады. Арасында жасөспірімдер арасындағы Тұңғыш олимпиада чемпионы Жәнібек Қандыбаев та бар. Ал 120 келідегі жерлесіміз қалай екені белгісіз, салмақ өлшеу рәсіміне кешігіп қалып, доданы бастамай жатып, аяқтады.