Әкім сыйлық үлестірді

Ел Тәуелсіздігінің 20 жылдығына орайластырылған түрлі жоба-бастама мен мәдени-көпшілік шара республика­мыз­дың әр өңірінде көрініс тауып келеді.
Бұл бағытта қолға алынған игілікті істің бірі таяуда Қарағандыда жүзеге асты. Осы орайда Кеншілер мәдениет сарайында Қарағанды облысы әкімінің мәдениет және өнер қызметкерлеріне арналған жыл сайынғы сыйлығын тапсыру рәсімі болып өтті. Салтанатты шараға облыс басшылы­ғымен қатар жергілікті зиялы қауым мен бірқатар жастар қатысты. Ең таңдаулыларды іріктеп алған байқау комиссиясы облыс әкімінің дәстүрлі сыйлығының биылғы жылғы лауреаттарын жария етті.
Серік Ахметов, Қарағанды облысының әкімі:
– Елімізде мәдени саланы дамытуға айрықша көңіл бөлінетіндігін атап өткім келеді. Соның ішінде Қарағанды облысында да бірқатар рухани іс-шара жүзеге асуда. Тұрақты қаржыландыру ісі – материалдық-техникалық базаны нығайтуға, инновациялық техноло­гия­ны пайдалануға, жаңа жобаларды іске асыруға мүмкіндік берді. Өңірдің мәде­ниет және өнер қызметкерлері де өзде­рі­нің жоғары кәсібилігін үнемі дәлелдеп келеді. Биылғы жыл – ел Тәуелсіздігінің 20 жылдығы. Сондықтан біз бұл ме­рейлі мерейтойды ең жоғары деңгей­де атап өтуіміз қажет. Облыста бұл бағыттағы жұмыс әлдеқашан басталған болатын. Ұйымдастыру комитеті бекі­тіліп, арнайы жоспар әзірленді. Соған сәйкес қалалар мен елді мекендер абат­тандырылып, жаңа нысандар іске қосылатын болады. Әрине, концерт­тері, басқа да іс-шаралар өткізіліп, оларға осы өңірдің өнерпаздары тікелей атсалысатын болады.