Бүгінде ағылшын тілі мамандарының «қаны жерге тамбай тұрғаны» белгілі. «Престижный» мамандыққа қызығушылар саны күннен-күнге көбейіп келеді. Әсіресе, облыс аумағында жұмыс істеп жатқан шетелдік компанияларға аудармашылар ауадай қажет екендігі аян. Маман болғанда да сөзбе-сөз аударатын кәсіби мамандарға сұраныс көп.
Облыс орталығында ағылшын тілі курстары баршылық. Сұранысқа орай, аса қажетті тілді үйренгеннің ұтылмасы тағы анық. Дей тұрғанмен, өз ана тілімізді үйрететін курстардың кемдігі көңілге қаяу түсіріп жүрген. Осы олқылықтың орны толған сыңайлы. Облыс орталығында қазақ тілін тегін оқытатын «Тілашар» жедел курстары ашылып, тіл үйренушілерге көмек қолын созуда.
Мәскеу НОКРАБЕКОВ, тіл орталығының директоры:
– Екі айлық курс 200-ден астам үйренушіні қамтымақ. Олар күнделікті тұрмыста қолданылатын ауызекі сөйлеуді үйренетін болады. Тілек білдірушілер баршылық. Әсіресе студенттер арасында ниеттеніп келіп жатқандар көп.
Ағылшын тілі курстары ақылы болса да, үйренушілер басым. Айына 3,5-5 мың теңге сытырлатып санап беруіңіз керек. Қазақ тілінің курсы тегін болса да, келіп жатқандар аз көрінді. Дегенмен келешекте қазақ тіліне деген қызығушылық артады деген сенім басым.