Оқулыққа қатысты дау тағы да жұрттың ашуын тудырды. Бұл жолы 4-сынып оқушыларына арналған әдебиеттік оқу хрестоматия пәнінің кітабын басып шығарғандар жұрт назарына ілінді, - деп хабарлайды Alashainasy.kz тілшісі "Экспресс К"-ға сілтеме жасап.
Түсініксіз басылған кітапты оқушының әкесі видеоға түсіріп алған. Оның айтуынша, бұл оқулықты баласына мектеп берген. Оқулықты "Алматы" баспасы шығарған. Жап-жаңа кітап 16-беттен кейін бірден 89-бетке бір-ақ өтеді.
Бейнежазба ТікТок желісінде жарияланды.
"16-бетте Ер Тарғын мен Тарлан аттың ерлігі туралы жазылған болса, одан кейін ары қарай бірден 89-бетке бір-ақ түсеміз. Сосын 90,91,92 деп жалғасып, 100-бетке келгенде мұнда кітап мазмұны жазылған. 102-бетте оқулық бітеді. Сосын 36-беттен бастап жалғасады. Қалай құрастырылған кітап бұл? Кім түсіндіріп береді? Сұмдық қой... Өзі жап-жаңа оқулық. Шамасы карантин кезінде шыққан-ау", — дейді ер кісі.
Видеоны көрген желі қолданушылары бұл кітапты қызу талқылап жатыр.
"Жауаптылар қайда қарап отыр?", "Енді ол бетті іздеп табу да — өнер, бала ізденсін, дамысын деген шығар", "Масқара, қалай-қалай басқан?", "Кітаптарда мұндай сөзден, есептен, құрастырудан қателер көп. Өкінішті", "Сұмдық қой мынау", "Ортасын жемқорлар жеп қойған ғой", "Ұятын-ай", "Баспадағылар ішіп отырып басқан ба?", "Білім министрі не қарап отыр?", "Қысқасы, кітапты өзіңіз қайтадан реттейсіз-ау, әйтпесе балаңыздың миы ашиды" деп жазды желі қолданушылары.