К.Д.Ушинский біз сөзінде «Мұғалім ісі сырттай қарапайым болғанымен, ең ұлы істердің бірі» - деген екен.
Расында, мұғалім мамандығы өте маңызды мамандық. Уақыт сырғыған сайын өзгеріп отыратын білім мазмұнын жетік меңгере отырып, баланың санасына білім нәрін құйып, тұлғалық қасиетін аша білетін ұстаздың сан қырлылығына тәнті боласың.
Ұстаз – шығармашыл, дана, ізденімпаз тұлға болатын болса, ол оқушының бақыты емес пе? Ұстаз - оқушыларын өз баласынан кем көрмей, еңбек ете білудің қыр-сырын танытып, жетістігіне шын жүректен қуанып, өмір жолын айқындап беретін ардақты жан. Ал болашаққа апаратын жүрдек пойыздың алдымен "бастауыштың" бекетіне келіп тоқтайтыны хақ! Яғни, әр баланың болашағының кірпіші бастауыш сыныпта қаланады.
"Өз тәжірибем жайлы айтар болсам, қиындығы мен қызықшылығы қатар жүретін игі істің басында жүргеніме биыл 8 жыл болыпты. Осы уақыт аралығында өз таңдауыма еш өкінген емеспін. Ақ пен қараны ажырата алмай алдыма келген әр балаға бар мейірімімді төгіп 42 әріпті ықыласыммен үйретіп, әр баланың жүрегіне жол тауып, өз анасындай болып келемін. Білім берумен қатар, тәрбиенің тал бесіктен басталатынын жете ұғынып, жас ұрпақтың бойына ізгілік жолын ұсынғаным үшін кеудемді мақтаныш кернейді. Әр балаға жеке-жеке көңіл бөліп, өзіне тән мінез-құлқымен әдеп дағдысын дұрыс жолға бағыт алғанын қадағалап отыратынымды бір сәт естен шығарған емеспін. Бәсекеге қабілетті білімді ұрпақтың болашаққа апарар жолдамасын мен ұсынатыным менің бойымды жауапкершілік биігіне апарады. Осыған орай, менің мақсатым – өз ойын ашық айтып, өз көзқарасын айқындай білетін ақпарат кеңістігіне еркін бойлап,өмір өзенінің ағысына қарсы жүзе алатын көшбасшы дайындау".
Егеменді еліміздің ертеңі – болашақ ұрпақта. Тәуелсіздігіміз бен елдігімізді сақтап қалу үшін жастарымыз білімді, білікті болуы тиіс. Сондықтан баланың білім алуын назардан тыс қалдырмауымыз керек. Білімді ұрпақ қана ел тізгінін ұстар дара тұлға болмақ.
Білімнің негізі – бастауыш демей ме? Сондықтан баланың жан-жақты дамып, тұлғалық қасиеттерінің бастауышта қаланатыны айқын!
Бектас Құралай Өтепқызы
Алматы қаласы Алатау ауданы
И.Қ.Мандоки атындағы №154 ЖББМ
бастауыш сынып мұғалімі