Қазақ бұрын жүрек ауруымен ауырмаған. Мұны «Ұлттық ғылыми медициналық орталығының» директоры Абай Байгенжиннің де аузынан естіген едік.
Әлия Өтембайқызының қан қысымы ауруына, инсультқа әкеп соғатын аурулардың молекулярлық-генетикалық механизмдерін анықтапты. Жалпы, молекулярлық-генетикалық жұмыстар бір ұлттың ішінде ғана жүргізіледі екен. Әлия Жолдасбекова зерттеу объектісі ретінде тек қазақ ұлтын ғана алған. Оның айтуынша, қазақта жүрек аурулары тұқымқуалаушылық арқылы берілуі мүмкін. «Әкесі, шешесі не атасы мен әжесінің бірі инсульт алған болса, олардан туған балалардың денсаулығын жіті қадағалау керек. Оларға да бұл аурулар тұқым қуалау арқылы берілуі мүмкін», – дейді ол кеше Астанада өткен «Санофи-Авенсис 2010 жылдың медициналық гранты» байқауының жеңімпаздарын марапаттауға арналған жиында.
Ал енді қазақ бұрын неге жүрек ауруымен ауыра қоймаған? Қазір неге мұндай ауруларға қазақтың басым көпшілігі шалдығатын болды? «Негізінен, жүрек аурулары, қан қысымы холестериннен болады. Қазақ ұлты ежелден, өмір бойы ет жеп, ет жегенде де семіз малдың майлы етін жеп, сорпасын ішіп күн көріп келген. Осыған байланысты біздегі жүрек ауруларының факторларына холестерин жатпайды. Біздегі жүрек ауруына себеп болатын негізгі фактор – стресс, күйзеліс. Қазақ – ежелден көшпелі, сайын даланы еркін жосып жүрген азат халық. Біз гендік тұрғыдан стрестен қорғанбағанбыз», – дейді Әлия Жолдасбекова. Міне, осы еңбегі үшін профессор «Кардиология» аталымы бойынша Денсаулық сақтау министрлігі мен «Санофи-авенсис» фармацевтикалық компаниясы ұйымдастырған грантты жеңіп алды.