Үш көзді, сегіз аяқты қозы туылды

Жуырда Павлодар облы­сындағы Павлодар ауданына қарасты Шақат елді мекенінде мутант қозы дүниеге келген. Төл үш көзі және сегіз аяғы бар болып туылған. Мал иесі Қуан­дық Бекітаевтың айтуынша, қой егіз қозы тууы керек еді. Алайда  оның болжамы орындалмапты.
Қуандық Бекітаевтың төрт түлік өсірумен айналысқанына 20 жылдан асыпты. Алай­да осы жылдар аралығында мұндай оқиға екінші рет қайталаныпты.    
Қуандық БЕКІТАЕВ, Шақат ауылының тұрғыны:
– Бұл қозының енесі өзі  туа алмай­тын болғандықтан, араласуға тура кел­ді. Қозыны көргенде таңғалдым. Менің ойымша, бұл – экологиялық жағдайдың «жемісі». Менің иелігімдегі төрт түлік электролиз зауытының жанында жайы­лады. Ерекше қозының тууы осының салдары болуы әбден мүмкін. Өткен жылы үш аяқты қозы туылған. Шаңыра­ғым­да жеті балам бар. Болашағына алаңдаймын. Экологиялық жағдайдың салдарынан осындай оқиға адамдар арасында да кездесуі ғажап емес. Сон­дықтан жаңа туылған қозының денесін лақтырмай, жұртшылыққа көрсетсем деймін. Мақсат – ой салу.
2009 жылы Наурыз мерекесі қарса­ңын­да Ақтөбе облы­сының Ойыл ауда­нын­да да екі басты бұзау туылған еді. Сол кезде мамандар «мұндай мутацияға өңірдегі ра­диациялық ахуал себеп болуы мүмкін де­ген» болжам жасаған болатын.