«Тойдың болғанынан боладысы қызық»
Әне-міне дегенше, еліміздің бас қаласы - Астананың 12 жылдық мерейтойы да таяп қалыпты. 
Шілденің 6-сына дейін әлі бір жарым айдай уақыт бар десек те, бұл мерзімнің де көзді ашып-жұмғанша өте шығары анық. Мемлекеттік мереке деңгейінде аталып өтіле бастаған осы бір айтулы мейрам биыл қалай тойланады? Қала тұрғындары мен қонақтарын биыл қандай думанды қызықтар, дүбірлі іс-шаралар күтіп тұр? Құрылыс қарқынын тоқтатпаған жас қаланың сәулет көркін ашатын тағы қандай әсем ғимараттар игілікке қосылады?
Жұрт көптен күткен, назарын тігіп жүрген қаланың қоғамдық тіршілігінде өзіндік мәнге ие болуы тиіс «Шабыт» шығармашылық орталығы, «Мәскеу» көпфункционалды кешені, сулы-жасыл желектегі «Изумруд орамы» сынды маңызды нысандар құрылысы аяқталуы тиіс. Бірақ соның бәрінен айшықтысы – маусым айының аяғына қарай есігін ашатын, елорданың сол жағалауында орналасқан «Назарбаев университеті» мен шілденің 5-інде ресми ашылатын «Хан-Шатыр» болмақ. «Хан-Шатыр» негізі конструкциялық шешімі мен сәулеті жағынан бірегей ғимарат болғандықтан ұйымдастырушылар осы бір ерекше жобаның ашылуын есте қаларлықтай қызықпен әрлемек ниетте көрінеді.
