«Таблиғи Жамағатқа» заң бойынша тыйым салынды

Республикамызда «Таблиғи Жамағат» заңмен тұңғыш рет экстремистік ұйым деп танылды. Еліміздің аумағында оның қызметіне тыйым салынды.
ҚР Бас прокуратурасының баспасөз қыз­метінің хабарлауынша, кеше Астана қаласы прокуратурасының арызы бойын­ша Астана қаласының Сарыарқа аудандық соты «Таблиғи Жамағат» халықаралық ұйы­мын экстремистік деп тану және Қа­зақ­стан Республикасында оның қызметіне тыйым салу туралы шешім шығарды. Бұл шешімді шығару барысында көрсетілген ұйымның қызметінің экстремистік бағыт­та екендігі қолда бар материал­дармен қатар, халықаралық ұйымның Ре­сей Федера­циясында, Өзбекстан Респуб­ликасында және Тәжікстан Республика­сында сот тәр­ті­бімен экстремистік деп та­нылғаны және тыйым салынғаны назар­ға алынды. Еске сала кетейік, ақпанның 20-сы күні ҚР Ұлт­тық қауіпсіздік комитеті елі­міздің аума­ғында радикалды салафиттік бағытты ұстанған 24 ағым, олардың мү­ше­лерінің жалпы саны 495 адам екенін ха­барлаған болатын. «Википедияның» мәлі­меті бо­йынша, «Таблиғи Жамағат» – бей­саяси діни ұйым. Ол әлемнің 150 еліне ен­ген. Мүшелерінің саны 70-80 млн адам­ға жуықтайды.