Сәтбаевқа сән кірді

Семейдегі Сәтбаев көшесі көркіне енді. Бұл – қаладағы ең ұзын әрі орталық көшелердің бірі. Қаланы Мирный ауданымен жалғайды әрі «Омбы-Майқапшағай» тас жолына шығатын транзиттік жол болып табылады.
1970-80 жылдары құрылысы жүрген Сәтбаев көшесі осы күнге дейін толық жаңартудан өтпеген. Биылғы жылы қала әкімі Мейрамхат Айнабековтің қолдауымен көшенің бес шақырым аумағы толық күр­делі жөндеуден өтті. Жөндеу жұмыстары «Жол картасы» бағдарламасы аясында жүргізілгендіктен, 376 адам жұмысқа тартылды. Көше бойындағы автотұрақтар, аулалар жаңартылды. Балалар ойнайтын алаңдар қайта қалпына келтіріліп, жарақ­тандырылды. Асфальт төселген жолдың айналасы абаттандырылды.
Көшедегі жол қауіпсіздігін сақтау үшін жол бойындағы қоршаулар жаңадан орнатылды. Аталған көшеге жөндеу жүр­гізген бас мердігер компания «Гордор­строй» ЖШС, ал абаттандыру, көркейту жұмыстарымен «Семей» көгалдандыру МҚК айналысты.
Жөндеу жұмысы кезінде тұрғындардың демалуына қолайлы жағдайлар да естен шығарылмады. Олар үшін Ертіс өзенінің жағалауы көркейтілді. Қазірде тақтайдай тегіс тас жол төселіп, көркейту жұмыстары аяқталған Сәтбаев көшесі алыстан көз тартып тұр. Бұл әсіресе сол маңда тұратын жергілікті халық үшін үлкен қуаныш болды. Жаңартудан өткен Сәтбаев көшесі салта­натты түрде ашылды. Игі шараға облыс әкімі Бердібек Сапарбаев арнайы келіп қатысып, семейліктерді құттықтап, сөз сөйледі.
Шара аясында жергілікті өнер­паздар ән мен жырдан шашу шашты. Бұл күні аудан халқы үшін ауылшаруашылық өнімдерінің жәрмеңкесі ұйымдас­тырыл­ды.