Алматы қаласының Бостандық ауданында еріктілер көздері, құлақтары мен мұрынын желімделген марғауды тауып алды. Куәгердің айтуынша, мұны жергілікті балалар жасаған, деп хабарлайды Stan.kz ақпарат агенттігі.
Алматы зооқорғау ұйымының еріктісі Санета Космынина өзінің Facebook-тегі парақшасында марғаудың суретін бөлісті.
"Жаңа ғана ауладағы балалардан мысықтың баласын алып кеттік. Олар мұрнына, аузына, құлағына желім толтырған. Клиникаға барамыз", - деп жазды Санета Космынина.
Санета Космынина марғаудың Орбита-2 шағын ауданынан кездейсоқ табылғанын айтты.
"Біз қарт әйелдің айқайлағанын естідік. Сонда бардық. Ол марғауды балалардан алып қойды. Біз жануарды клиникаға апару үшін көлікті күтіп тұрғанда, әжей бұл жерде үнемі осындай жағдай болатынын айтты. Балалар өте қатал: марғауларды таспен ұрады, мұртын, құйрығын кесіп тастайды. Оған қоса, ата-аналар балаларына ескерту жасамайды. Ал кейбіреулері оларды жігерлендіреді. Олар жарақат келтіретін құралдарды сатып алып, балалармен бірге атып кетеді. Яғни олар осылай үлгі көрсетіп жатыр", - деп ашуланды ерікті.
Ерікті марғаудың зооклиникада тексерілгенін айтты. Оның бір көзі сау, ал екіншісі үшін күресу керек.
"Бұл екі айлық марғау. Ол жаңа ғана туған. Ал балалар бәрін жапсырып қоймай, аузын балшыққа толтырды. Дәрігерлер жартысын әрең шығарды, қалғандарын алу мүмкін болмады, өйткені оның терісі өте нәзік. Осыдан кейін біз марғауды сүтпен тамақтандырдық, ол өте аш болды. Енді марғаудың желімнен кейін көзінің көруін сақтай аламыз ба деген мәселе туралы әңгіме болып отыр. Оған тамшы қойылды, үш күннен кейін түсінікті болады", - деді Санета Космынина.
Еріктінің айтуынша, қазір олар осы балалардың ата-аналарының үстінен полицияға арыз жазуға ниетті.
"Біз міндетті түрде полицияға жазамыз. Бұл жағдайды тоқтатудың жалғыз жолы", - деп қорытындылады ерікті.