Мәжілісмен Тұрғын Сыздықовтың айтуынша, елімізде импорттық препараттарға сұраныс бірден төмендеп кеткен. Яғни, қазір сапалы дәрі қарапайым жұртқа қолжетімсіз деп хабарлайды КТК арнасы.
Дәрі. Көрнекі фото: google.ru
"Қазір жұрттың шетелдік сапалы препараттарды сатып алуға шамасы келмейді. Ал интернетте адамдарды алдап-арбайтын түрлі саудагерлер мен түсініксіз дәрі-дәрмектің жарнамасы қаптап кеткен", - дейді мәжіліс депутаты Тұрғын Сыздықов.
Оның үстіне препараттардың бағасы біркелкі емес. Бір дәрінің құны дәріханаларда әртүрлі. Айырмашылығы тіпті жер мен көктей. Бұл - тек пайда табуды көздеген алыпсатарлардың қолдан жасап отырған қымбатшылығы дейді депутат.
Ал отандық дәрі-дәрмек шығаратын зауыттардың өндірісі 30 пайызға артқанымен, одан нарықтағы медикоменттердің сапасы жақсарғаны байқалмайды және бағаға да еш әсер етпеген. Сондықтан, мәжілісмен Денсаулық сақтау министрінен препараттардың құнын реттейтін арнайы құжат қабылдауды талап етті.