Екі полицейді атып кетті

Кеше түнде Ақтөбе облысы Темір аудандық ішкі істер бөлімінің екі қызметкерін белгісіз біреулер атып кетті. Оқиға Шұбарши елді мекенінде болған. Екі полицей де оқиға орнында жан тапсырды.
Патрульдік полиция қызметінің сержанттары Нұр­лан Алпысбай мен Айдос Боранбаев қызметтік «УАЗ» көліктерімен кезекшілікке шыққан. Түнгі 00.00-лер шамасында полиция бекетіне Mitsubishi Delica кө­лі­гімен келген белгісіз біреулер қарудан оқ жау­дырыпты. Ар­тынша оқиға орнынан іздерін суытқан. Тәртіп сақ­шы­лары атыс болған жерде жан тапсырды. Ақтөбе об­­лыстық ІІД баспасөз қызметінің жетекшісі Алмат Иман­ғалиевтің айтуынша, қазір аталған дерек бо­йынша ҚР ҚК-нің 96-2 «Екі немесе одан да көп ада­м­ды өлтіру» бабы бойынша іс қозғалды. Оқиға болған жер­ді тексеру барысында оқ-дәрілер табылған. Қазір Шұбаршиде жедел-іздестіру топтары жұмыс істеп жатыр. Ел ішінде «тәртіп сақшыларын теріс діннің өкіл­дері өлтіруі мүмкін» деген қауесет гу етті. Белгі­сіз­дер­дің қолынан көз жұмған полиция сержанты Нұрлан Алпысбай 1980 жылы туылған. Ішкі істер саласында қызмет еткеніне тоғыз жыл болған. Марқұмның артында жұбайы мен екі баласы қалды. Ал әріптесі Айдос Боранбаев 39 жаста болатын. 2005 жылдан бе­рі құқық қорғау органдарына қызмет еткен. Айдос Бо­ранбаев та отбасылы болған. Екі баласы бар. Бүгін облыс әкімі Елеусін Сағындықов қызмет барысында көз жұмған полиция қызметкерлерінің туған-туыс­та­рына көңіл айтты. Әрқайсысының отбасына 1 млн тең­геден материалдық көмек көрсетілетін болды. Құ­қық қорғау органдары басшыларымен кездескен облыс басшысы кісі өліміне қатысы барлар табылып, қа­таң жазалануы тиіс екендігін айтты.