Астанада Ахмедия әндері қалықтады

Өткен ғасырдың 70-80-жыл­дары қазақтың ән өнерінің алтын қорына «Бір тамшы жас», «Тамшылар», «Есіл ағады», «Нұрлы бейнең» секілді 200-ге тарта ғажайып ән туындыларын қосып, өнерсүйер қауымның ыстық ықыласына бөленген Мәдениет қайраткері, талантты композитор Ахмедия Есмұханов биыл мерейлі 60 жасқа толды. Сазгердің мерейтойына орай, Астанада «Есіл ағады» шығармашылық кеші өтті.
Жезқазған өңірінің тумасы Ахмедия Есмұхановтың есімі қалың қазаққа жақсы таныс. Әртүрлі жанрда жазылған 200-ге тарта әндері бар. Соның ішінде танымал әндерінің қатарында «Тамшылар», «Бір тамшы жас», «Алау гүл», «Махаббат сәулесің», «Балапаным», «Есіл ағады», «Қарағанды», «Нұрлы бейне», «Ағалар», «Сен мені түсінбедің», «Түн» әндерін қазақ эстрадасының жұлдыздары Роза Рым­баева, Мақпал Жүнісова, Қыдырәлі Болманов, Қарақат Әбілдина, Қайрат Нұр­тас, сондай-ақ «МузАрт», «Каспий» тобы орындап жүр. Бұл жолы да Ахмедия Есмұханов­тың жанды тербеп, жүректі толқытқан әуезді әндері Астана жұрт­шылығының ыстық ықыласына ие болды. Жиын барысында мерейтой иесіне жолданған ҚР Премьер-министрі Серік Ахметовтің құттықтау хаты оқылды. Онда: «Қазақтың ән өнері өресіне әу баста «Тамшылар» әнімен танылған талантты композитор Ахмедия Есмұханов сүбелі үлес қосып жүр. Ол әйгілі «Қаракөз» ансамблін алғашқы құраушылардың бірі һәм оны халқымен қайта қауыштыру мақсатында тынымсыз тер төкті. Қазақтың алтын қорына қайталанбас, өзіндік қол­таңбасы бар інжу-маржандарын қалдыр­ған дарынды әншінің өнері әрдайым халықтың назарында болды. Өнеріңіз өрге жүзе берсін», – делінген.
Кеш барысында сазгер «Қаракөз» ан­самблінің қосылуымен әндер орындады. Бұл кеш – арада қаншама уақыт өтсе де, А. Ес­мұхановтың әндерінің өз өміршеңдігін жоймағандығының айқын дәлелі. Кон­цертке жиналған қауым әншімен қосыла шырқап, жастық шақтарына сапар шек­кендей болды. Аталған ән кешінде сазгер әншінің  шәкірттері көрерменге мерейтой иесінің әндерінен шашу шашты.