Алматыдағы дауыл: 36 тал құлағаны туралы хабар түсті
Алматыда екпінді жел, жауын-шашын мен қар аралас жаңбыр салдарынан қала аумағында ағаштар мен бұтақтардың құлау фактілері тіркелді, деп хабарлайды ҚазАқпарат Алматы қаласының Төтенше жағдайлар департаменінің баспасөз қызметіне сілтеме жасап.
Баспасөз қызметінің мәліметтеріне қарағанда, табиғаттың дүлей күшінің салдарын жою жұмыстарын аудандық әкімдіктердің мердігер ұйымдары мен Алматы қаласының құтқару қызметі жүзеге асырып жатыр. 29 наурыз күнгі сағат 19:00-дегі жағдай бойынша «112» желісіне ағаш құлауға қатысты 36 қоңырау келіп түскен. 31 ағаш, 5 үлкен бұта құлаған, оның ішінде 21 ағаш көліктерге құлаған. Пульттік мониторинг қызметінің ақпаратына сәйкес, бұтақ құлауынан 1 ересек адам болмашы дене жарақатын алған. Барлық тіркелген жағдай бойынша аудандық төтенше жағдай бөлімдері, аудандық әкімдіктердің мердігер ұйымдары мен Алматы қаласының құтқару қызметі жұмыс істеп жатыр. Жасыл экономика басқармасының ақпаратына сәйкес Алматыда 2,8 млн тал болса, оның 84,6 мыңы шіріп, құлағалы тұр. Жүргізілген сараптамаға сәйкес, негізінен қауіпті ағаштар қаланың орталық және шет аймақтарында тұр. «Аудан әкімдіктерінің аппараттары мен Жасыл экономика басқармасы бірлесе отырып қауіп тудырып отырған ағаштарды кесіп, орнына жас талдар отырғызып, қаланың жасыл қорын қалпына келтіру жұмыстарын жүргізіп келеді»,-делінген хабарламада.
ҚазАқпарат
