Солтүстік Қазақстан облысы әкiмдiгiнiң отырысында өңiр басшысы Құмар Ақсақалов облысқа келетiн қонақтар мен туристердің көбiсi Имантау-Шалқар курорт аймағы туралы бiлмейтiндiгiн айтты, - деп хабарлайды Алаш айнасы.
«Мен бiзге келетiн қонақтардан Имантауға және Шалқарға бардыңыздар ма деп сұраймын. Олардың 90 пайызы жоқ деп жауап қатады. Бұл жарнаманың жоқтығынан, интернетте белсендi жұмыс жүргiзу керек. Басшылар өздерi осы жерлерге барып, аяқтарымен жүрiп өтсiн. Қазiр осы жиналыста сауалнама жүргiзе бастасам, кейбiреулерiңiз бармаған болып шығарсыздар», — деп атап өттi Құмар Ақсақалов.
Қазiр облыста туризм саласы жақсы қарқынмен дамып келедi. Статистикаға сүйенсек, былтыр облысқа келген туристердiң саны 56% артып, 63 мыңнан аса адамды құрапты. СҚО әкiмiнiң орынбасары Дәурен Жандарбектiң айтуынша, туристер негiзiнен Ресей, Өзбекстан, Қытай, Қырғызстан, Түркия, Украина және Германиядан келедi екен. Биыл облыс басшылығы Имантау-Шалқар курорт аймағын дамыту арқылы туристердiң санын одан әрi көбейтудi көздеп отыр. Тек осы аймақтың жолдарын жөндеуге 3,2 млрд. теңге қаржы бөлiндi.
Айыртау ауданында тарихи, емдiк, спорттық, аң және балық аулау туризмi жақсы дамып келедi. Былтыр 106 миллион теңгеге 53 жазғы үйлер тұрғызылды. Туризмдi одан әрi дамыту мақсатында 65 гектар алқапты алып жатқан 11 жер үлесi бөлiндi. Биыл курорт аймағында 10 заманауи демалыс базалары салынбақ. Инвестициялардың жалпы көлемi 411 миллион теңгенi құрайды. Аталмыш аймақта көптеген коттедждер, жазғы үйлер, дәмхана және дүкендер бой көтередi. Шалқар көлiнiң жанында автокараванингты дамыту көзделген. Яхта және желкен спортын дамыту да жоспарланып отыр.
Таңат Жайлау