Қорғаныс министрінің бұйрығымен Радиоэлектроника және байланыс әскери-инженерлік институтында, Әуе қорғанысы күштері, Әуе шабуылына қарсы қорғаныс әскерлеріне қарасты Радиотехникалық рота командирлері орынбасарларының курстық дайындығы өтуде.
Еліміздің барлық аймағында әуе кеңістігін күзетіп отырған Отанқорғушы офицерлердің кәсіби деңгейін арттыратын курстық дайындық бір айға жоспарланған. Оқу үдерісі барысы институтымыздың радиотехникалық әскерлері кафедрасының негізінде өткізілуде.
Курстық дайындықтың мақсаты, институттың оқу бөлімінің ұйымдастыруымен осы бағыттағы заманауый жетістіктерді негізге ала отыра тыңдаушылардың кәсіби деңгейін арттыру. Оқыту барысында офицерлердің спорттық дайындығы, мергендік өнерлері, психологиялық моральдік тұрғыдағы жағдайлары бағаланды.
Дайындықтан өтуші офицерлермен институт бастығы половник Мұстабеков Асқар Досбосынұлы кездесіп, Қорғаныс министрінің бұйрықтары мен талаптарын жеткізді және қазіргі қорғаныс саласындағы әскери қызметшілерге Жоғарғы Бас Қолбасшымыз тарапынан жасалып жатқан жағдайларды айта келе, еліміздің әуе кеңістігін күзетуде артылып отырған сенімді жоғалтпай, адал орындау ол-әрбір офицердің негізгі міндеті екенін қадап айтты.
Оқу үдерісінің жоспары бойынша далалық жағдайда техникалармен жұмыс істеу барысы қарастырылған. Курстық дайындыққа радиотехникалық әскерлер кафедрасының бастығы полковник Гарапов Айдар Асығатұлы жетекшілік етеді. Демалыс күндері Алматы қаласының көрнекті орындарына саяхаттар жоспарланған.
Ербол Алибаев,
РЭЖБӘИИ баспасөз қызметінің бастығы
Суретті түсірген Ербол Алибаев