ШҚО-да ормандағы өртпен күрес жалғасуда
Шығыс Қазақстан облысы Ұлан ауданындағы орман өртінің беті қайтпай жатыр, - деп хабарлайды Alashainasy.kz тілшісі "ҚазАқпарат"-қа сілтеме жасап.
ШҚО Төтенше жағдайлар департаменті баспасөз қызметінің мәліметіне сүйенсек, Ұлан ауданы Асубұлақ орман шаруашылығы аумағында таулы, жартасты, жетуі қиын жерде шөп пен бұта өртенген. Тілсіз жаумен күрес әлі жалғасуда. Жақын маңдағы елді мекендерге төніп тұрған қауіп жоқ.
«Өртті сөндіруге қалың шөп, тау мен жартасты жерлер қиындық келтіруде. Осындай жағдайда отты ауыздықтауға тікұшақтың көмегі зор. Ең әуелі «Қазавиаорманқорғау» мекемесінің МИ-2 тікұшағымен өрт болған жерге аэровизуалды тексеру жүргізілді», - делінген ақпаратта.
«Қазавиақұтқару» мекемесінің МИ-8, Қорғаныс министрлігінің МИ-17 және ШҚО әуе бөлімшелерінің МИ-8 тікұшақтары су төгетін құрылғылармен өртті сөндіруде. Осы уақытқа дейін барлығы 120 рет су төгілді.
Айта кетейік, жалпы қызыл жалынмен күреске орманшылардан, өрт сөндірушілерден және жергілікті атқарушы органдардан 250-ден астам адам, 35 техника және 5 тікұшақ жұмылдырылған.
