Әрбір бесінші геймер баланың басы ауырады
Менің мектепте оқитын балам компьютер клубтарына барып, ойын ойнағанды жақсы көреді. Мектептен келген соң тамақ ішіп алып, бірден сонда кетеді. Ол үйде жалғыз бала болғаннан кейін шектеу қойғым келмейді. Ал көршілерім компьтерлік ойындардың бала денсаулығына зиян екенін айтады. Мен ол ойындардың қандай зияны бар екенін білгім келеді?
Балжан ҚАНАТҚЫЗЫ, Алматы қаласы
Статистикалық дерекке сүйенсек, елімізде 700-ге жуық ойын клубы тіркелген. Олардың арасында күндіз-түні дамылсыз жұмыс істейтіндері тағы бар. Күн сайын клуб қызметін – 7,5 мыңнан аса бала пайдаланады екен, олардың арасында екі мыңнан астамы 7-12 жастағы жасөспірімдер. Ал енді сіздің сұрағыңызға келейік, бала компьютер клубтарында негізінен, атыс-шабыс, кісі өлтіру, тонау, неше түрлі құбыжықтармен арпалысу сынды оқиғаларға құралған ойындарды ойнайды. Бұл бала психологиясының бұзылуына, мінезінің өзгермелі болуына, тіпті денсаулығының нашарлауына алып кеп соғады. Мұны ғалымдардың зерттеуі де дәлелдеп отыр. Республикалық психиатрия және наркология ғылыми-практикалық орталығының деректерін сүйенсек, елімізде осындай клубтарға баратын 12-13 жастағы оқушылардың 80 пайызы физиологиялық, 10 пайызы жүйке жүйесі жағынан зардап шегуде. Сондай-ақ әрбір бесінші баланың басы ауырады екен.
