Эфирде – «КЕШ ЖАРЫҚ!»
Күн ұясына қонақтап, қала кешкі шамдарын жаққан сәтте үйіне жұмыстан асыға жеткен жұртшылықты Ұлттық арна «Кеш жарық!» деп қарсы алатын болды. Жаңа туындының тұсаукесеріне қазақтың «Бозжорғасын» аузынан тастамайтын сонау Ресейден «На-на» тобы келді.
Небәрі бір ай көлемінде әуе толқынына жол тартқан осынау бағдарламаны өздеріңізге белгілі тележүргізуші Бақыт Қанат, әнші Айгүл Иманбаева, КВН лигасының чемпионы Сәкен Тоқтағұлов жүргізетін болады. Бұл – бастапқысы. Ал эфирден көрінбейтін кадр сыртында қаншама телеарна қызметкерлері бар.
Әр бағдарламада көрермен қауымын қазақ эстрада жұлдыздарының әсем әуенімен қатар, «Тамаша», «Бауыржан шоу», «Шымкент шоу», «Шаншар», «Екі езу» сынды белгілі театрлардың майталмандары күлкіге толы әзіл-қалжыңымен қуантатын болады. Жаңалығы сол, әсіресе, ән өнеріне жаңадан қадам басып келе жатқан жас буын өнерпаздардың киелі сахна төріне шығуына жол ашып отыр. Жоба режиссері Айгүл Ақсамбиева бағдарламаны түсіру барысында ешқандай қиындықтардың болмағанын, озық техникалық құралдармен жабдықталған студияның мол мүмкіндіктерін мақтан етті.
