Өткен жыл ауыл шаруашылығы үшін ауыр тиді. Әсіресе, егіншілік саласындағы олқылықтарды тізіп берді.
Жақында Үкіметте өткен селекторлық кеңестердің бірінде Солтүстік Қазақстан, Қостанай, Павлодар облыстарының әкімдері бір ауыздан Премьер-министрге осы мәселені жеткізді. Көктемгі егістің басталуына санаулы күндер қалды, көзді ашып-жұмғанша күз де келеді, ал элеваторлар аузы-мұрнынан шыға өткен жылдың дақылдарына толып тұр.
«Қызылжардың қоймаларында тұрақтандыру қорына сатып алынған «Азық-түлік келісімшарт корпорациясы» акционерлік қоғамының 1 миллион тоннадай бидайы сақтаулы. Оларды оңтүстік облыстардағы элеваторларға тасымалдау ісін жеделдетсе, жөн болар еді», – деп Серік Біләлов бастаған әкімдер бұйымтайларын жеткізген болатын. Себебі бір Булаев элеваторындағы дақылдардың 70 пайызы – мемлекеттік қорға сатып алынған астық. Қазір аталмыш кәсіпорында бос орын мүлдем жоқ.
Биыл Қызылжар диқандары 6 млн 100 мың тонна астық жинады. Бірақ соның тең жартысы қоймаларға сыймай қалды. Сатылғанынан қалғандары қар астында жатты. Себебі облыстағы астық қабылдау кәсіпорындары мен элеваторлардың сыйымдылығы – 3 миллион тонна ғана.
Николай КУЛИКОВ, Солтүстік Қазақстан облысы Агроөнеркәсіп кешенінің аумақтық инспекциясының бастығы:
– Биыл Мағжан Жұмабаев, Айыртау, Ақжар аудандары мен Петропавл қаласында жаңа астық қабылдау мекемелерін салу жоспарда бар. Жақында Ғабит Мүсірепов ауданында бір элеватор іске қосылды. Сөйтіп, облыстағы элеваторлар саны 48-ге жетті. Жылда диқандар жинап алған астықтарын қысқа қалдырмай сатып жіберетін, биыл экспорт дұрыс болмағандықтан, бәрі элеваторларға тасыды. Қазір аздап әкетіп жатыр, соның өзінде элеваторлар 65-70 пайыз толық.
Еркебұлан МӘМБЕТОВ, «Мәмбетов және компания» командиттік серіктестігінің директоры:
– Былтырғы жылы жиналған астықты өткізу мәселесі ауыл шаруашылығы құрылымдарының басшыларының басын қатырды. «Мәмбетов және компания» командиттік серіктестігінде өткен егіс науқанында астық түсімі гектарына 27 центнерді құрады. Жиналған өнімнің 7 мың тоннасы күзде «Азық-түлік келісімшарт корпорациясына» сатылған болатын. Дәл осыншамасы қоймада жатыр. Ал егіс науқаны болса жақындап қалды.