Қазақстанның Халық жазушысы, қазақ поэзиясының көрнекті өкілі, лирик ақын Тұманбай Молдағалиев 75 жасқа толды. Осы орайда Алматы облысы, Еңбекшіқазақ ауданы, Есік мәдениет үйінде ақынмен кездесу өтті. Салтанатты кездесуге Алматы облысының әкімі Серік Үмбетов, Қазақстанның Халық ақыны Мұхтар Шаханов және басқа да елге танымал азаматтар қатысты.
Біз – жазушыларымызды жадымызға тоқып, ақындарымызды жүрегімізбен оқып, шығармаларын шырқау биікке қоятын елміз. Өлеңдері арқылы халқымыздың жүрегінен терең орын алған Тұманбай Молдағалиевті оқырмандарға таныстырудың өзі артық шығар. Кезінде Тұмағаңа қазақтың талай арыстары тамсанып, жылы лебіздерін сыйлаған екен. ХХ ғасырдың көрнекті жазушыларының бірі Сәбит Мұқанов: «Қазақ поэзиясының аспанына жарқырап шыққан жұлдыздардың бірі – Тұманбай Молдағалиев» десе, ақын Әбділда Тәжібаев: «Тұманбай – ақындығымен қоса, таңғажайып адам» деп жоғары бағалаған. Биыл ақын 75 жасқа толуына орай, Алматы облысының әкімі Серік Үмбетов ақынның туған күнін Алматы қаласында емес, туған жерінде өткізуді ұйғарыпты. «Баяғыда елуге келгенімде осы залда ел жиналып, әжептәуір жасқа келгендей сезініп едім. Осыдан және жиырма бес жыл өтіпті. Үзік-үзік боп жетпіс бесті де тойлап жатырмыз. Осы күнге келгеніме шүкіршілік етемін», – деді салтанатты жиында мерейтой иесі. Алматы облысының әкімі Серік Үмбетов ақынға жылы лебіздерін арнап, Тұмағамыздың 75 жасқа толуына орай, 075 нөмірлі темір тұлпарды сыйға тартты. Қазақстан Жазушылар одағы басқармасының төрағасы Нұрлан Оразалиннің айтуынша, «ақынның 500-дей өлеңіне ән жазылған. Кезінде Тұманбай Молдағалиев ағамыздың өлеңдерінсіз жігіт қызға сөз айтпайтын», – деді. Әлі күнге дейін ақынның өлеңдерін жатқа білетін Мұхтар Шаханов: «Тұманбай Молдағалиев қазақтың өлең жазу техникасына жаңалық әкелді. Ақындардың өлеңдерінде кездесетін техникалық олқылықты жойып, поэзияға жаңа қырынан келді» деп ақынға ұзақ ғұмыр тіледі.
Серік ҮМБЕТОВ, Алматы облысының әкімі:
– Кез келген адамның маңдайына жазыла бермейтін бақыт болады. Ол – елін, жерін сүйіп, аялай білген азаматқа халқының дән риза пейілі, ыстық ықыласы, жан тазалығы, дарындылық сияқты биік қасиеттері. Бұл сөздерді қазақ поэзиясының аса көрнекті өкілдерінің бірі Тұманбай ағамызға қаратып айтуымызға болады. Ақын ағамыздың туындыларын жырсүйер қауым жазбай таниды. Оқырмандар сүйсіне оқиды. Мәтін мәнді болмаса, ән шықпайды. Бүгінде Жетісу жұртшылығы Тұманбай ағамызды «біздің жерлесіміз» деп мақтан тұтады. Ақын ағамызға ұзақ ғұмыр, қазақ халқының терең махаббатын тілеймін.
Нұрлан ОРАЗАЛИН, Қазақстан Жазушылар одағы басқармасының төрағасы:
– Тұманбай Молдағалиев – қазақтың өлеңін өкпелетпей, жырының жанарына қаяу түсірмей, биіктен-биікке көтеріп келе жатқан санаулы саңлақтарымыздың бірі. Себебі ағамыздың поэзия әлемінде жаратқан дүниесі – тұтас бір дәуір. Уақыт, заман дейтін кеңістікті байқататын, өлмейтін өлеңдерді тудырған ақын ағамыздың өлеңдері халықтың мінезін, елдің махаббатын көрсетеді.
Мұхтар ШАХАНОВ, Қазақстанның Халық жазушысы:
– Орыс поэзиясы Пушкинге дейін өзінің техникалық мәселелерін шешіп алған. Ал қазақ поэзиясы бұл мәселені 1960 жылдардың басында зорға шешті. Оған дейін әртүрлі деңгейдегі ақындар болды. Бірақ барлығының өлеңдері техникалық проблемаға ұшыраған еді. Тұманбай Молдағалиев өлең жазу техникасына ерекшелік әкеліп, жұрттың назарын поэзияға бұра білді. Кезінде ағамыздың өлеңдерін жатқа оқыдық. Мен күні бүгінге дейін ағамыздың біраз өлеңдерін жатқа білемін. Қаншама жастар Тұманбай ағамыздың өлеңдерін жаттап өсті. Осы тұрғыдан келгенде, Тұманбай Молдағалиев қазақ жастарын поэзияға тәрбиелеп келеді деп айтуға болады.