Биыл Астана қаласындағы №38 қазақ мектеп-лицейі өзінің іргетасы қаланғанына 10 жыл толуын салтанатты жағдайда атап өтпек.
1999 жылы жаңа үлгіде салынған осы білім шаңырағын Елбасы Нұрсұлтан Назарбаевтың өзі ашып, лентасын қиып, жас ұрпаққа ақ тілегін арнаған болатын. Ерекше мәртебеге ие бұл мектеп-лицейдің ұстаздары сол күннен бастап өздеріне жүктелген міндетті абыроймен атқарып келеді. Жамал Базарқұлқызы Қасымбек басшылық жасайтын ұжымда тәжірибелі ұстаздар қауымы қызмет етеді. Мұнда, әсіресе, дарынды балалармен жұмыс істеу ісі өте жақсы жолға қойылған. 5-11-сынып аралығындағы оқушылар ғылыми жұмыстармен айналысады. Сондай-ақ осы білім шаңырағында Олимпиадалық резерв мектебі бар.
Жамал БАЗАРҚҰЛҚЫЗЫ, Астана қаласындағы №38 қазақ мектеп-лицейінің директоры:
– Биылғы түлектеріміз мемлекеттік сынақта жоғары нәтиже көрсетті. Бұл біздің мектеп-лицейдің он жылдық мерейтойына шәкірттеріміздің жасаған лайықты сыйлығы мен құрметі деп білеміз. Өткен жылы түлектеріміздің білім көрсеткіші 94 пайызды құраған болса, биыл 101 пайызға жетті. Осы білім ұясында тәлім алған шәкірттер алдағы уақытта да үлкен жетістіктерімен қуанта беретініне кәміл сенемін.